Opnunin í Eldvatni í Meðallandi, skammt frá Kirkjubæjarklaustri fer vel af stað. Áin er ein af þekktari sjóbirtingsám á landinu og er býsna víðfeðm. Vorveiðin gekk vel í upphafi veiðitímans en svo lokar áin þar til haustgöngurnar hefjast.
Veiði hófst á nýjan leik í Eldvatni síðastliðinn fimmtudag og eru leigutakar meðal veiðimanna. Í gærkvöldi voru komnir á land 27 sjóbirtingar og voru þeir býsna vel haldnir. Erlingur Hannesson er einn af leigutökum og hann sagði í samtali við Sporðaköst að þetta liti mjög vel út. „Fiskurinn er að dreifa sér og við höfum verið að sjá fiski alveg frá Brú og upp í Foss. Við erum sértaklega ánægðir með hvað fiskurinn lítur vel út og er í góðum holdum.“
Fyrir fimm árum hófu núverandi leigutakar að sleppa umtalsverðu magni af seiðum og vonast þeir til að þær sleppingar fari nú að skila sér. „Núna í haust og næsta vor vonumst við eftir að sjá aukningu í veiðinni ef sleppingar hafa tekist eins og við vonum. Þetta er í raun prófasteinninn,“ sagði Erlingur.
Erlingur segir þá hafa séð mikið af fiski og opnunin sé með betra móti. Stærstu fiskarnir fram til þessa eru bolta hrygnur allt upp í 85 sentímetra að lengd. Veiðistaðurinn Villi er eins og oft áður mjög drjúgur en einnig hefur veiðst vel í hyljunum Hundavaði og Þórðarvörðu.
Melalækur er ein af hliðarám Eldvatnsins og taldi Erlingur það góðs viti að efst í læknum veiddist silfurbjartur sjóbirtingur í gær. Veiðitímabilið núna stendur fram til 20. október.
Þær flugur sem hafa verið að gefa best er Dýrbítur svartur og orange og einnig orange Skull.
Lengd á laxi | Veiðisvæði | Veiðimaður | Dagsetning Dags. |
---|---|---|---|
101 cm | Vatnsdalsá | Erlendur veiðimaður | 29. september 29.9. |
101 cm | Eystri-Rangá | Grzegorz Loszewski | 27. september 27.9. |
105 cm | Hvítá við Iðu | Katrín Tanja Davíðsdóttir | 24. september 24.9. |
101 cm | Víðidalsá | Jón Eðvald Halldórsson | 22. september 22.9. |
107 cm | Grímsá | Jón Jónsson | 22. september 22.9. |
101 cm | Miðfjarðará | Agnar Sigurjónsson | 22. september 22.9. |
101 cm | Hvítá við Iðu | Gunnar Pétursson | 20. september 20.9. |