Nils landaði þremur risum í sumar

Nils Folmer með hænginn úr Silungabakka í Víðidalsá. Þessir hausthængar ...
Nils Folmer með hænginn úr Silungabakka í Víðidalsá. Þessir hausthængar eru tignarlegar skepnur. Ljósmynd/Aðsend

Nils Folmer Jörgensen, dansk íslenski laxahvíslarinn landaði sínum öðrum Víðidalsárlaxi í sumar sem er yfir hundrað sentímetrar að lengd. Að þessu sinni í Silungabakka sem er veiðistaður á neðsta svæði árinnar og þekktur stórlaxastaður. Nils fékk fiskinn fyrr í vikunni og tók hann Autumn Hooker hálftommu túbu.

Að söng Nils var fiskurinn þykkur og flottur og tók algerlega neðst í hylnum. „Mér sýnist vera mikið af fiski í Silungabakka, meira en menn halda. Það eru búin að vera sérlega erfið skilyrði í túrnum okkar. Mikið vatn og virkilega kalt,“ sagði Nils í samtali við Sporðaköst.

Hér má sjá veiðistaðinn Dalsárós. Kaffibrún Dalsáin vellur fram og ...
Hér má sjá veiðistaðinn Dalsárós. Kaffibrún Dalsáin vellur fram og litar allt fyrir neðan. Víðidalsá fór í fimmtíu rúmmetra rennsli í dag en hefur í sumar verið á bilinu 2 til 3 rúmmetrar á sekúndu. Ljósmynd/NFJ

Hann fékk fyrr í sumar fisk sem var rétt yfir hundrað sentímetrar í Kolugljúfrum í Víðidal. „Það er svolítið af virkilega stórum fiskum í Víðidal og jafnvel töluvert stærri en þessi. Ég náði ekki að setja í þá, en þeir eru þarna og það er gaman að sjá það,“ bætti Nils við. Þriðja „hundraðkallinum“ landaði hann í Nesi fyrr í sumar.

Þetta er áttundi „hundraðkallinn“ úr Víðidalsá í sumar og vekur það sérsaka eftirtekt, þar sem sumarið hefur verið rólegt hvað varðar veiði í ánni.

mbl.is