Það þarf að leita töluvert mörg ár aftur í tímann til að finna sambærilegt ár miðað við laxagengd í Leirvogsá. Árni Kristinn Skúlason, veiðiumsjónarmaður með ánni, segir óhemjumikið af fiski þegar gengið í hana. „Þó svo að árið í fyrra hafi verið hörmung er gaman að sjá að veiðin er þegar orðin mun betri en var í fyrra og ég hef ekki séð svona mikið af fiski í henni í langan tíma. Hún er hins vegar ekki mikið stunduð þannig að hún á töluvert inni,“ sagði Árni Kristinn í samtali við Sporðaköst.
„Veiðimenn um daginn settu í sjö laxa á fyrsta hálftímanum. Fiskurinn var mjög tökuglaður en sleit alltaf í stórgrýti. Þarna er erfitt að landa vegna grjóts enda heitir veiðistaðurinn Grjótin. Flestallir fiskarnir tóku púpur og litlar laxaflugur veiddar andstreymis. Þetta voru mjög vanir veiðimenn og hafa þeir aldrei séð annað eins í laxveiði,“ sagði Árni. Þessar tvær stangir settu í þrjátíu laxa á deginum.
Árni Kristinn segir sögu af þessum sömu veiðimönnum. Norska veiðikonan Tuva ætlaði sér að ná maríulaxinum í Leirvogsá og það gekk raunar eftir. En fyrst missti hún nokkra. Hér er frásögn af einni viðureigninni sem varð söguleg. „Fiskurinn straujar upp á móti straumi, fer upp Snoppu og rýkur út á undirlínu! Hann sest niður í holu undir bjargi og þá eru góð ráð dýr. Emil mundar háfinn og leggur hann í holuna. En þegar hann ætlar að háfa kemur vandamál – hann veit ekki hvaða fisk hann á að háfa. Holan er full af laxi, Emil er vanur veiðimaður og veit að fiskurinn sem er á er stór, 85 sentímetra að lágmarki! Hann leggur háfinn gætilega niður og háfar hann, allir fagna og Emil lyftir háfnum en þá er vitlaus fiskur í honum. Hann háfaði fallegan sjóbirting í staðinn fyrir laxinn! Því miður þumbast laxinn út og losnar af í flúðunum fyrir neðan.“ Þessi saga frá Árna segir vel til um að það er mikið af fiski í Leirvogsá og á morgunvaktinni í dag taldi veiðimaður að það væru rúmlega 300 fiskar í Snoppu, hann hefur veitt Leirvogsá í mörg ár og hefur aldrei séð annað eins.
Lengd á laxi | Veiðisvæði | Veiðimaður | Dagsetning Dags. |
---|---|---|---|
101 cm | Vatnsdalsá | Erlendur veiðimaður | 29. september 29.9. |
101 cm | Eystri-Rangá | Grzegorz Loszewski | 27. september 27.9. |
105 cm | Hvítá við Iðu | Katrín Tanja Davíðsdóttir | 24. september 24.9. |
101 cm | Víðidalsá | Jón Eðvald Halldórsson | 22. september 22.9. |
107 cm | Grímsá | Jón Jónsson | 22. september 22.9. |
101 cm | Miðfjarðará | Agnar Sigurjónsson | 22. september 22.9. |
101 cm | Hvítá við Iðu | Gunnar Pétursson | 20. september 20.9. |