Mikil óvissa ríkir á laxveiðimarkaði. Þessi óvissa snýr að nokkrum þáttum. Í fyrsta lagi standa víða yfir viðræður milli landeigenda og leigutaka. Óvíst er hvernig þeim viðræðum mun ljúka en ljóst að mikið tekjutap varð víða á þessum markaði í sumar.
Í öðru lagi er alger óvissa um sölumál fyrir næsta sumar. Þetta hafa margir leigutakar staðfest við Sporðaköst. Og eins og einn orðaði það: „Það er enginn útlendingur að fara að senda okkur peninga í dag. Þeir hlæja bara að manni ef spurt er. Menn eru til í að panta en ekki borga,“ sagði einn af mörgum leigutökum sem rætt var við.
Efnahagsástandið og slæmar horfur á Íslandi gera það líka að verkum að sala til íslenskra veiðimanna er stórt spurningarmerki. Ekki bætir úr skák að síðustu tvö sumur hafa verið léleg í laxi og krafa um lækkun á verði veiðileyfa verður sífellt háværari.
Laxá í Kjós og Bugða eru komnar í hendur nýs leigutaka og hefur hann boðað verðlækkanir yfir hluta tímans um allt að 35%. Ljóst er að leigutakar eru víða að fara fram á sambærilega hluti.
Samningur um Grímsá er laus en það er Hreggnasi ehf. sem verið hefur með ána á leigu. Viðræður standa yfir en óljóst hver niðurstaðan verður.
Það eru fram undan skrýtnir tímir á þessu sviði og ógerningur að segja fyrir um þróun mála. Hafi klisjan fordæmalausir tímar einhvern tímann átt við þá er það á þessu sviði og núna.
Lengd á laxi | Veiðisvæði | Veiðimaður | Dagsetning Dags. |
---|---|---|---|
101 cm | Vatnsdalsá | Erlendur veiðimaður | 29. september 29.9. |
101 cm | Eystri-Rangá | Grzegorz Loszewski | 27. september 27.9. |
105 cm | Hvítá við Iðu | Katrín Tanja Davíðsdóttir | 24. september 24.9. |
101 cm | Víðidalsá | Jón Eðvald Halldórsson | 22. september 22.9. |
107 cm | Grímsá | Jón Jónsson | 22. september 22.9. |
101 cm | Miðfjarðará | Agnar Sigurjónsson | 22. september 22.9. |
101 cm | Hvítá við Iðu | Gunnar Pétursson | 20. september 20.9. |