Besta opnun síðan að niðursveiflan hófst

Opnunarhollið í Norðurá lauk veiðum á hádegi í dag og hafði þá veitt í tvo og hálfan dag. Niðurstaðan var umfram væntingar en undanfarin ár hefur opnunin verið frekar dræm. Segja má að niðursveifla hafi hafist í laxveiðinni þurrkasumarið 2019. Frá þeim tíma hefur veiði á landsvísu verið um og undir meðaltali. Þar munar að sjálfsögðu miklu um veiðina í Borgarfirði en hún er nánast ráðandi þáttur í heildartölunni þegar upp er staðið.

Samtals landaði opnunarhollið 35 löxum og eins og gefur að skilja voru þetta nánast allt tveggja ára laxar en þeir mæta að öllu jöfnu fyrr í árnar og hafa verið tvö ár í sjó á meðan að smálaxinn dvelur ekki nema eitt ár í sjó. Þó gerðist það í Norðurá að einn smálax veiddist og telja menn það yfirleitt vita á gott að hann sé svo snemma sumars á ferðinni.

Þórir Traustason með þann þriðja sem Blanda hefur gefið. 76 sentímetrar á Breiðu suður. Þessi tók Kolskegg. Ljósmynd/Starir

Þessi niðurstaða er ekkert loforð inn í sumarið en er afskaplega ánægjulegt upphaf í þessari lykilá sem allir fylgjast með. Til samanburðar voru komnir í bók 38 laxar í Norðurá þann 15. júní í fyrra. Fiskur var að ganga í Norðurá af krafti í aðdraganda og í kjölfar stórstreymis sem náði hámarki í gærkvöldi. Opnunardagurinn gaf sextán laxa og algilt er að eftir það dragi verulega úr veiði, þegar búið er að taka hrollinn úr þessu og veiða uppsafnaða fiska. Það gerðist nefnilega ekki í opnunarhollinu í Norðurá. Dagur tvö, 5. júní gaf líka sextán fiska og voru flestir þessara fiska grálúsugir.

Heldur rólegra var yfir hlutunum í morgun en þá veiddust þrír laxar á lokavakt opnunarhollsins. Samtals 35 og umfram væntingar flestra.

Jóhann Birgisson yfirleiðsögumaður í Miðfjarðará horfir á laxa neðarlega á breiðunni fyrir neðan Kistufoss í Vesturá. Þeir sáu laxa neðan við Hlíðarfoss og einnig í Hlaupunum í Austurá. Ljósmynd/RVA

Hann er víða mættur

Laxar hafa verið að sjá víða síðustu daga. Blanda er að opna rólega en þar eru komnir þrír á land. Pollýönnur í laxveiðiheiminum benda á að þetta sé mun betra en í fyrra. Þá veiddist enginn lax í opnunarhollinu og raunar ekki fyrr en 13. júlí.

Sporðaköst hafa frétt af staðfestum löxum í nokkrum ám, þar sem menn hafa verið að sýsla til að undirbúa opnun. Þannig sáust laxar í Myrkhyl í Þverá en opnunin þar verður á fimmtudag. Daginn eftir byrjar svo veiðin í Kjarrá eða Kjarará eins og sífellt fleiri vilja kalla hana.

Mögnuð sjón. Lax í gjúfrunum í Laxá í Kjós. Töluvert hefur sést af laxi í Kjósinni þrátt fyrir erfitt skyggni á köflum. Ljósmynd/Laxá í Kjós

Í Miðfirði sáu menn bæði laxa í Vesturá og Austurá. Fiskar voru mættir á hefðbundna staði eins og í Kistufoss og Hlíðarfoss. Þá sáu þeir félagar Rafn Valur Alfreðsson og Jóhann Birgisson lax í Hlaupunum í Austurá.

Af þessum fréttum má ráða að laxveiðisumarið fer af stað á jákvæðum nótum hvað sem verður svo þegar líður á. En í þessu er best að taka bara einn stórstraum í einu.

• Blogga um frétt

Seinustu hundraðkallar sumarsins