Stjórn Stóru–Laxárdeildar Veiðifélags Árnesinga hefur lýst því yfir að deildin ætli að kljúfa sig út úr Veiðifélagi Árnesinga – VÁ, og stofna sérstakt veiðifélag um Stóru–Laxá. Stjórn Veiðifélags Stóru–Laxár hefur tilkynnt þetta formlega til VÁ.
Í tölvupósti sem Esther Guðjónsdóttir, formaður Veiðifélags Stóru–Laxár sendi til félagsmanna sinna segir: „Stjórn félagsins hefur sent Veiðifélagi Árnesinga tilkynningu um úrsögn úr því félagi og þau skilaboð að við hyggjumst starfa hér eftir sem sjálfstætt félag og mun fara í gegnum viðeigandi ferli á okkar aðalfundi og hjá Fiskistofu.
Ákvað stjórnin að senda þetta svona fyrir aðalfund VÁ af tillitsemi vegna fundarefna þeirra og fjárhagaáætlunar.
Stjórn Veiðifélags Stóru-Laxár mætir því ekki á aðalfund Veiðifélags Árnesinga í dag.“
Guðni M. Eiríksson, sviðstjóri lax og silungsveiðisviðs Fiskistofu er í fríi en hann kannaðist ekki við að formlegt erindi væri komið inn á þeirra borð varðandi úrsögnina.
Nauðsynlegt er að fá leyfi frá Fiskistofu ætli Stóru–Laxárdeild VÁ að kljúfa sig frá félaginu og stofna eigið félag. Lög varðandi veiðifélög gerir ráð fyrir að eitt félag séu um það vatnasvæði sem fiskistofn gengur um.
Þetta er þó alls ekki einhlítt og má horfa til Borgarfjarðar í því sambandi. Grímsá, Norðurá og Þverá/Kjarrá falla allar í Hvítá í Borgarfirði en um hverja á er sérstakt veiðifélag. Þarna virðist sem ósamræmi sé milli landshluta, verði Stóru–Laxá ekki heimilað að stofna eigið félag.
Viðbúið er að tekist verði harkalega á um þetta og óvíst að Veiðifélag Árnesinga samþykki þegjandi og hljóðalaust að Stóra–Laxá hverfi úr félaginu.
Áður hafa verið nokkrar erjur milli Stóru–Laxárdeildarinnar og móðurfélagsins og kærði VÁ meðal annars nýtingaráætlanir sem Stóra–Laxá og Tungufljót (sem er líka deild í VÁ) fengu samþykktar af þáverandi Veiðimálastofnun.
Ekki náðist í Jörund Gauksson formann Veiðifélags Árnesinga fyrir birtingu fréttarinnar.
Eins og gjarnan er sagt á Facebook þegar átök eða hörð skoðanaskipti liggja í loftinu. „Nú er ástæða til að halla sér aftur og poppa.“
Esther Guðjónsdóttir hafði samband og benti á að nafninu á félaginu var breytt fyrir áramót og heitir nú Veiðifélag Stóru–Laxár. Þar er Esther formaður. Félagið er skráð í fyrirtækjaskrá.
Lengd á laxi | Veiðisvæði | Veiðimaður | Dagsetning Dags. |
---|---|---|---|
101 cm | Vatnsdalsá | Erlendur veiðimaður | 29. september 29.9. |
101 cm | Eystri-Rangá | Grzegorz Loszewski | 27. september 27.9. |
105 cm | Hvítá við Iðu | Katrín Tanja Davíðsdóttir | 24. september 24.9. |
101 cm | Víðidalsá | Jón Eðvald Halldórsson | 22. september 22.9. |
107 cm | Grímsá | Jón Jónsson | 22. september 22.9. |
101 cm | Miðfjarðará | Agnar Sigurjónsson | 22. september 22.9. |
101 cm | Hvítá við Iðu | Gunnar Pétursson | 20. september 20.9. |