Tómas Kristjánsson
Tómas Kristjánsson
GLITNIR hefur selt skuldabréf fyrir 500 milljónir evra, jafngildi nær 45 milljarða íslenskra króna.

GLITNIR hefur selt skuldabréf fyrir 500 milljónir evra, jafngildi nær 45 milljarða íslenskra króna. Útgáfan er þó fyrst og fremst merkileg fyrir þær sakir að þetta er fyrsta opinbera skuldabréfaútgáfa Glitnis í evrum frá því í júní 2005 og í fyrsta sinn sem íslenskur banki sækir fjármagn á Evrópumarkað með þessum hætti eftir þær sviptingar sem urðu á mörkuðum fyrri hluta síðasta árs í kjölfar gagnrýni á bankana og íslenskt efnahagslíf.

Skuldabréfin sem Glitnir gaf út eru með 4,375% föstum vöxtum og með gjalddaga árið 2010. Nær tvöföld umframeftirspurn var eftir skuldabréfunum í útboðinu að því er fram kemur í tilkynningu bankans.

Vildu ná til evrópskra fjárfesta

"Það felst mikil hvatning í viðtökunum sem þetta skuldabréfaútboð fær. Með nýlegri skuldabréfaútgáfu okkar í dollurum, sem var alheimsútgáfa, vildum við meðal annars ná til evrópskra fjárfesta sem ekki hafa keypt skuldabréf af bankanum síðastliðið ár," segir Tómas Kristjánsson, framkvæmdastjóri fjármálasviðs Glitnis.

Hafa trú á bankanum

"Þessi skuldabréfaútgáfa nú, sem er í evrum á föstum vöxtum, sýnir okkur að evrópskir fjárfestar hafa mikla trú á bankanum og að umræðan um íslenskt efnahagslíf er nú í meira jafnvægi en áður."

Tómas bendir á að tvær síðustu skuldabréfaútgáfur Glitnis hafi endurspeglað sterka stöðu gagnvart skuldaálagi bankans (e. CDS spreads) og hafi gengið vel á eftirmarkaði.

"Nú á fyrstu þremur vikum ársins hefur bankinn þegar lokið mikilvægum áföngum í heildarfjármögnun ársins sem býður upp á fjölmörg tækifæri á komandi mánuðum og misserum," segir Tómas.