Jóhanna Friðriksdóttir fæddist í Nesi að Látrum í Aðalvík 10. febrúar 1914. Hún lést á Fjórðungssjúkrahúsi Ísafjarðar 1. september síðastliðinn. Foreldrar hennar voru hjónin Mikkalína Þorsteinsdóttir, f. að Borg í Skötufirði 18.8. 1892, d. 7.4. 1942 og Friðrik Geirmundsson, f. í Efri-Miðvík í Aðalvík 25.7. 1891, d. 26 9. 1967. Þeim hjónum varð 10 barna auðið og var Jóhanna þeirra elst, 2 þeirra systkina eru á lífi, þau Friðrik Sigurlíni, f. 20.6. 1931 og Elísabet Anna, f. 29.9. 1934.

Sonur Jóhönnu og Ingólfs Magnússonar frá Keflavík er Ingólfur Magnús Ingólfsson, f. 15.10. 1936, d. 7.8. 1997, maki Ingibjörg Ottósdóttir, þau eiga 5 börn.

Jóhanna giftist 6. janúar 1944 Pálma Ólafi Guðmundssyni, f. í Rekavík bak Látur 11.8. 1907, fórst með mb. Mumma frá Flateyri 10. október 1964. Foreldrar hans voru Ketilríður Þorkelsdóttir, f. 18.8. 1875, d. 18.11. 1925 og Guðmundur Pálmason, f. 28.1. 1878, d. 21.2. 1951. Börn Jóhönnu og Pálma eru: 1) Mikkalína Arí, f. 8.7. 1944, maki Halldór G. Þórðarson, þau eignuðust 5 börn og eru 3 á lífi. 2) Matthías Hrólfur, f. 17.3. 1946, maki Súsanna Sigurðardóttir, þau eiga einn son. 3) Guðmundur, f. 13.9. 1947, maki Ingibjörg S. Torfadóttir, þau eiga 2 börn saman og fyrir átti hún 2 dætur. 4) Jóna Sigurlína, f. 19.3. 1949, maki Árni Sædal Geirsson, d. 11.4. 1999, þau eiga 3 börn. 5) Elísabet María, f. 11.5. 1952, maki Rúnar Guðmundsson, þau eiga 4.börn. 6) Sigurveig, f. 29.7. 1954. Hún á eina dóttur með Einari Guðmundssyni og 2 syni með fyrverandi maka, Ómari Konráðssyni. Barnabörnin eru 44 og barnabarnabörnin 4.

Jóhanna giftist 15.4. 1968 Högna Sturlusyni, f. 15.4. 1919. Foreldrar hans voru Ingibjörg Bárðlína Ásgeirsdóttir, f. 23.4. 1898, d. 30.10. 1935 og Sturla Þorkelsson, f. 20.10.1889, drukknaði á mb. Nirði 12.12. 1924. Högni átti 7 börn með fyrri konu sinni Júlíönu Guðrúnu Júlíusdóttur, f. 24.7. 1921, d. 1.9. 1960 og eru 5 þeirra á lífi.

Útför Jóhönnu fer fram frá Ísafjarðarkirkju í dag og hefst athöfnin klukkan 11.

Elsku tengdamamma og amma er dáin.

Það er mikil sorg, nú getum við ekki farið vestur til hennar sem var vanalegt á hverju sumri, sérstaklega þegar hún bjó ennþá á Flateyri og síðar í Hnífsdal og Ísafirði. Það var alltaf gaman að heimsækja tengdamömmu og ömmu og við hlökkuðum alltaf til þegar við heyrðum að amma og Högni væru að koma suður. Við eigum marga dúkana málaða eftir þig amma mín og allar myndirnar sem þú tókst og sendir okkur. Þú varst búin að setja myndir af hverri fjölskyldu hverjar í sitt albúm. Það er gaman að eiga þetta eftir þig. Við minnumst þess hvað þú varst allaf létt á fæti og svo glöð og létt í lund. Þú signdir okkur í bak og fyrir þegar við kvöddumst og baðst Guð að vera með okkur. Nú er hún amma orðin engill, amma lifir þótt hún deyi, hún mun vera með okkur jafnvel meira en hún gat síðustu árin. Við biðjum Guð að taka á móti þessari góðu konu. Minningin um þig verður alltaf ljós í lífi okkar.

Við „vitum“ að m.a. Pálmi maðurinn þinn sem fórst með Mummanum frá Flateyri 10.10. 1964 tók á móti þér ásamt elsta syni þínum Ingólfi sem dó 7.8. 1997. Góða systir þín Þrúða og Gulli maður hennar sem fórust í snjóflóðinu á Flateyri en við hliðina á henni Þrúðu ætlar amma að liggja til eilífðar á okkar jarðnesku jörð.

Elsku Högni og börnin hennar; Mikka, Matti, Gummi, Jóna, Beta og Veiga, við vottum ykkur innilega samúð og öllum tengdum fjölskyldum.

Elsku amma og tengdó, hvíldu í friði.

Ingibjörg Ottósdóttir,

Jóhann, Magnea, Hrönn,

Halldór og Ásgeir Ingólfsbörn og fjölskyldur.

Elsku amma Jóa. Við systurnar viljum þakka þér fyrir allar stundirnar sem við áttum saman. Það var alltaf tekið vel á móti okkur heima hjá ykkar afa. Þú varst alltaf að gera handavinnu og eigum við marga fallega muni eftir þig.

Far þú í friði,

friður Guðs þig blessi,

hafðu þökk fyrir allt og allt.

Gekkst þú með Guði,

Guð þér nú fylgi,

hans dýrðarhnoss þú hljóta skalt.

(Valdimar Briem.)

Eins og þú kvaddir okkur kveðjum við þig, Guð blessi þig, þínar

Tinna og Anna Lóa.

Þá er runnin upp sú stund að hún amma Jóa er farin til nýrra heimkynna, farin til ættingjanna og gamalla vina sem bíða okkar og nýrra endurfunda.

Hún var lágvaxin og hafði til að bera mikinn kærleik, það var sama hvar hún kom öllum þótti strax vænt um hana. Það sem við getum lært af henni er að nota kærleikann meira og kunna að þiggja hann líka. Þegar hún kom með dolluna með molunum þá fylgdi kærleikur hverjum mola og við þáðum með kærleik.

Ég man þegar hún og afi voru að byrja að vera saman, strax var þessi góða kona orðin amma okkar. Við náðum strax mjög vel saman, hún hafði hæfileika til að skynja þarfir hvers og eins. Börnin hændust strax að henni, það var einnig mjög vinsælt að fara með ömmu á hólinn.

Ég og fjölskylda mín erum mjög þakklát fyrir að hafa fengið að kynnast þessari góðu konu.

Elsku afi og allir hinir, Guð geymi ykkur öll.

Högni Svanbergsson

og fjölskylda.

Það er komið að kveðjustund. Amma er dáin. Okkur finnst það skrítið að amma á Ísó sé ekki lengur hjá okkur. Við teljum okkur mjög gæfurík að hafa fengið að hafa ömmu svona lengi í lífi okkar. Þó svo að við hefðum ekki hitt hana eins oft og við vildum hafði hún svo mikil áhrif á okkur. Það er erfitt að sitja hér með blað og penna og minnast hennar. Hvar er best að byrja, minningarnar eru svo margar. Við sitjum saman og hugsum til hennar með bros á vör. Fyrstu minningar okkar um ömmu eru tengdar Hnífsdal þar sem hún bjó. Við munum eftir ljúfum sumrum og húsinu hennar sem geymdi svo marga skemmtilega og framandi hluti. Við hugsum með bros á vör til garðsins þar sem amma tjaldaði og raðaði inn garðálfum. Meðal þeirra stillti hún okkur börnunum upp með djúsfernur og svo smellti hún af hinni fullkomnu mynd. Albúmin hennar eru full af þessum fullkomnu myndum, ljúfum minningum. Lítill drengur uppi við vegg handleikur lítinn bát. Lítil stúlka í sófa umkringd gömlum dúkkum, myndir af frænda að spila handbolta í sjónvarpinu. Albúmin eru full af öllu sem hún upplifði og maður fór ekki í heimsókn til hennar án þess að skoða myndirnar hennar.

Enginn fór frá ömmu án þess að fá brjóstsykur. Amma bauð boxið fullt af góðgæti og signdi svo fólkið sitt áður en kvatt var. Núna signum við hana og þökkum fyrir allt sem hún hefur gefið okkur. Hún var ljós í lífi okkar.

Elsku amma Jóhanna, hér er bænin sem þú kenndir okkur og við munum enn þá. Guð blessi þig og geymi.

Endar nú dagur, en nótt er nær,

náð þinni lof ég segi,

að þú hefur mér, Herra kær

hjálp veitt á þessum degi.

Vertu nú yfir og allt um kring

Með eilífri blessun þinni

Sitji Guðs englar saman í hring

sænginni yfir minni.

(Sigurður Jónsson frá Prestshólum.)

Þín barnabörn,

Ólöf Erla, Konráð Grétar

og Sævar Geir.

Elsku Jóa Frænka (með stóru F-i). Því þú varst uppáhaldsfrænka okkar systranna sex á Grundarstíg 12.

Það voru margar ferðirnar sem ég fór upp Kátubrekkuna og til þín í Litlaholt. Þar var alltaf gott að koma og alltaf var maður velkominn, þótt þú værir sjálf með fullt hús af börnum.

Takk fyrir allt, elsku Jóa, við eigum svo margar myndir og minningar sem við geymum. Þú varst alveg einstök kona alltaf kát og glöð, dansandi og veifandi höndum þegar þú kvaddir. Ég kveð þig eins og þú kvaddir mig alltaf, þú signdir mig og baðst svo Guð að geyma mig.

Elsku Högni, frændsystkini og aðrir aðstandendur, minning um góða konu lifir.

Hver minning dýrmæt perla að liðnum

lífsins degi,

hin ljúfu og góðu kynni af alhug þakka hér.

Þinn kærleikur í verki var gjöf,

sem gleymist eigi,

og gæfa var það öllum, er fengu að

kynnast þér.

(Ingibjörg Sigurðardóttir.)

Þín systurdóttir

Kristín Gunnlaugsdóttir.