<strong>Fögnuður</strong> Leikmenn Stjörnunnar og Sigurður Eggertsson úr Val fagna bikarmeistaratitli í Laugardalshöll.
Fögnuður Leikmenn Stjörnunnar og Sigurður Eggertsson úr Val fagna bikarmeistaratitli í Laugardalshöll.
[ Smellið til að sjá stærri mynd ]
ÍÞRÓTTAÁRIÐ er brátt á enda. Á næstu dögum mun Morgunblaðið rifja upp það sem bar hæst í umfjöllun íþróttafréttamanna Morgunblaðsins í hverjum mánuði fyrir sig. Að sjálfsögðu eru íslenskir íþróttamenn – og -konur í aðalhlutverkum. 2.

ÍÞRÓTTAÁRIÐ er brátt á enda. Á næstu dögum mun Morgunblaðið rifja upp það sem bar hæst í umfjöllun íþróttafréttamanna Morgunblaðsins í hverjum mánuði fyrir sig. Að sjálfsögðu eru íslenskir íþróttamenn – og -konur í aðalhlutverkum.

2. mars: „Það var algjör draumur að fá að taka þátt í þessu með strákunum,“ sagði Dagur Sigurðsson , fyrrverandi fyrirliði íslenska landsliðsins í handknattleik, sem lék með Valsliðinu síðustu mínúturnar í bikarúrslitaleiknum við Gróttu í handknattleik karla. Dagur skoraði tvö mörk og sýndi að hann hefur engu gleymt í úrslitaleiknum sem endaði með öruggum sigri Vals, 31:24, en Hlíðarendaliðið hafði titil að verja í keppninni. Þetta var í sjöunda sinn sem Valur fagnar sigri í keppninni.

2. mars: „Undirbúningurinn fyrir leikinn var mjög skemmtilegur. Við fórum í Mecca Spa og slökuðum á í pottinum. Svo var matur hjá Atla [Hilmarssyni] þjálfara, æfing í Laugardalshöllinni með tónlistina í botni og borðað hjá Ingvari vini okkar á Salatbarnum. Vikan í kringum bikarúrslitaleikinn er alltaf skemmtilegasta vika ársins,“ sagði Sólveig Lára Kærnested leikmaður Stjörnunnar eftir 27:22 sigur liðsins gegn FH í bikarúrslitaleik kvenna í handknattleik. Þetta var í sjötta sinn sem Stjarnan verður bikarmeistari í kvennaflokki og varði Stjarnan titilinn frá árinu 2008.

9. mars: „ Ég verð betri og betri með hverju árinu sem líður, það er alveg á hreinu. Mótspyrnan er samt farin að aukast og maður sér alveg að hinir strákarnir fljúga áfram,“ sagði borðtennissnillingurinn Guðmundur E. Stephensen úr Víkingi sem landaði sínum sextánda Íslandsmeistaratitli í einliðaleik. „Þetta er voðalega gaman, alveg æðislegt. Núna getur maður farið heim og slappað aðeins af, sett fæturna upp í loft og reynt að láta blóðið renna úr þeim,“ sagði KR-ingurinn Guðrún G. Björnsdóttir sæl á svip eftir að hún varð Íslandsmeistari í einliðaleik kvenna í borðtennis. Þetta er í fjórða sinn sem Guðrún nær þeim árangri.

12. mars: Ísland hafnaði í sjötta sæti Algarvebikarsins í knattspyrnu kvenna eftir ósigur gegn Kína, 1:2, í Portúgal. Heildarniðurstaða mótsins var því óvæntur sigur á Norðmönnum, 3:1, en síðan þrír ósigrar gegn liðum sem öll eru í hópi þeirra fremstu í heiminum.

16. mars: „ Um leið og ég sleppti spjótinu vissi ég að kastið væri langt en að það færi yfir 60 metra reiknaði ég ekki með,“ sagði Ásdís Hjálmsdóttir úr Ármanni í gær eftir að hún hafði bætt eigið Íslandsmet í spjótkasti um 62 sentímetra, kastað 60,42 metra, og hafnað í þriðja sæti á Vetrarkastmóti Frjálsíþróttasambands Evrópu á Kanaríeyjum.

16. mars: Þróttur úr Reykjavík varð bikarmeistari í blaki karla og er því áratugar löng bið félagsins eftir titli í karlaflokki á enda. Þróttur lagði baráttuglaða KA-menn 3:2 í leik þar sem Akureyringar komust í 2:0. HK varð bikarmeistari kvenna með 3:1 sigri á ungu og skemmtilegu liði Þróttar frá Neskaupstað.

16. mars: Fríða Rún Einarsdóttir og Viktor Kristmannsson fögnuðu Íslandsmeistaratitlum í áhaldafimleikum en þetta var sjöundi titill Viktors í röð.

23. mars: Íslendingar töpuðu fyrir Færeyingum í fyrsta sinn í sögunni þegar þjóðirnar áttust við í vináttulandsleik í Kórnum í Kópavogi. Færeyingar hrósuðu 2:1, í sigri í 22. landsleik þjóðanna en fyrir leikinn í gær höfðu Íslendingar unnið 20 af leikjunum og úrslitin því söguleg.

30. mars: Skautafélag Reykjavíkur tryggði sér Íslandsmeistaratitilinn í íshokkíi karla með 7:3 sigri á SA í Skautahöllinni í Laugardal. „Við vorum oft verið í basli í vetur en héldum haus og menn léku hver fyrir annan og liðið í síðustu leikjum,“ sagði Richard Eiríkur Tahtinen , þjálfari SR.

30. mars: Það er óhætt að segja að Tinna Helgadóttir úr TBR hafi átt sviðið á Íslandsmótinu í badminton sem fram fór í íþróttahúsinu við Strandgötu í Hafnarfirði. Tinna varð þrefaldur Íslandsmeistari en hún sigraði í einliðaleik, tvenndar- og tvíliðaleik. Og er hún 17. einstaklingurinn sem nær þeim árangri. Helgi Jóhannesson úr TBR fagnaði tveimur Íslandsmeistaratitlum.Helgi sigraði Huga Heimisson í úrslitum í einliðaleiknum og það tók Helga og Magnús Helgason aðeins 19 mínútur að landa meistaratitlinum í tvíliðaleiknum, þriðja árið í röð.

31. mars: Karatefélagið Þórshamar náði þeim einstaka árangri á Íslandsmótinu í Kata að sópa til sín öllum gullverðlaununum.