Sigurður Jónsson tannlæknir er fastagestur í Sundhöllinni og félagar hans í „Sundhallarflokknum“ ganga allhart eftir vísum frá honum.
Sigurður Jónsson tannlæknir er fastagestur í Sundhöllinni og félagar hans í „Sundhallarflokknum“ ganga allhart eftir vísum frá honum. „Eitt sinn hafði ég romsað upp úr mér fjórum vísum, en datt þá í hug ein enn, þótti hins vegar nóg komið og geymdi hana til næsta dags og hún er svona:

Daglega einhver að því spyr,

hvort ekki sé von á neinu,

en aldrei hef ég farið fyr

með fjórar vísur í einu.“

Ein af vísunum fjórum var svohljóðandi:

Það getur alveg átt sér stað,

að einhver sannleikskorn leynist

í höfði mér, en hafa skal það

heldur sem sannara reynist.

Þegar útsendurum norska hersins var leyft að reka áróður hér, varð það til þess að Sigurður orti:

Nú þykist Norsarinn góður

að nýta sinn íslenska bróður.

Þeir mega sér hingað

menntskælinga

sækja í fallbyssufóður.

Rímnaskáldið Sigurður Breiðfjörð orti á sínum tíma:

Kylfu um herinn harðfenginn

hraustur gerir flíka.

Ekki sér hann sína menn

svo hann ber þá líka.

Hallmundur Kristinsson yrkir á fésbók:

Líkamans hreysti og lundar ég styð,

legg því í göngu og hleyp þá við fót,

brátt mun svo nálgast og blasir nú við

buskinn og fjarskinn og allt þetta dót!

Pétur Blöndal pebl@mbl.is