Staðan Fá verkefni í byggingaiðnaði og lítið sem ekkert framundan.
Staðan Fá verkefni í byggingaiðnaði og lítið sem ekkert framundan. — Morgunblaðið/RAX
Rúnar Pálmason runarp@mbl.is Rótgróin verktakafyrirtæki í byggingariðnaði hafa að undanförnu neyðst til að segja upp þeim starfsmönnum sem búa yfir mestu reynslunni og lengsta starfsaldrinum, lykilstarfsmönnum, vegna skorts á verkefnum. Friðrik Á.

Rúnar Pálmason

runarp@mbl.is

Rótgróin verktakafyrirtæki í byggingariðnaði hafa að undanförnu neyðst til að segja upp þeim starfsmönnum sem búa yfir mestu reynslunni og lengsta starfsaldrinum, lykilstarfsmönnum, vegna skorts á verkefnum.

Friðrik Á. Ólafsson hjá Samtökum iðnaðarins bendir á að ekkert fyrirtæki geti starfað án lykilstarfsmanna. Fyrirtækin vilji ekki missa þá en uppsagnirnar séu varúðarráðstöfun enda sjái þau fram á verkefnaskort. Komi þær til framkvæmda sé lítið orðið eftir af viðkomandi fyrirtækjum enda geti þau vart starfað án sinna mikilvægustu starfsmanna.

Margir afar reynslumiklir menn hafi þegar misst vinnuna og margir þeirra hafi flutt til útlanda í kjölfarið.

Þungt hljóð sé í byggingarverktökum. Nánast engin verkefni séu í vinnslu og ekkert í pípunum.

Erfitt sé að spá fyrir um hvort uppsagnir halda áfram í haust og vetur. „Og það er líka spurning hvort það eru einhverjir eftir til að segja upp,“ segir Friðrik.

Sigurður Bessason, formaður Eflingar, segir atvinnuleysið innan þeirra raða hafa heldur sigið niður.

„En maður hefur þó á tilfinningunni að það sé svikalogn,“segir hann.

Sigurður segist jafnframt óttast að mikið verði skorið niður í fjárlagafrumvarpinu.