Viðbúnir Starfsmenn FÍB gera sig klára fyrir annasama helgi.
Viðbúnir Starfsmenn FÍB gera sig klára fyrir annasama helgi.
Undanfarin 62 ár hefur FÍB verið með þjónustuvakt um verslunarmannahelgina og svo verður einnig um þessa helgi. Hjálparþjónusta FÍB miðast við að aðstoða bíleigendur á ferðalagi sem þurfa á þjónustu bílaverkstæðis að halda eða vantar varahlut.

Undanfarin 62 ár hefur FÍB verið með þjónustuvakt um verslunarmannahelgina og svo verður einnig um þessa helgi.

Hjálparþjónusta FÍB miðast við að aðstoða bíleigendur á ferðalagi sem þurfa á þjónustu bílaverkstæðis að halda eða vantar varahlut. FÍB-aðstoðarbílar verða á fjölförnustu leiðum og umboðsmenn félagsins um land allt eru í viðbragðsstöðu.

FÍB hefur, eins og undangengnar verslunarmannahelgar, kallað út liðsauka aðstoðarbíla sem verða á vegum landsins, félagsmönnum og vegfarendum til halds og trausts.

„BL hefur góðfúslega lánað félaginu nýlega bíla en þessir auka-liðsmenn FÍB-Aðstoðar verða á þeim um verslunarmannahelgina og kann félagið fyrirtækinu bestu þakkir fyrir velvild þess í garð bifreiðaeigenda yfir mestu ferðahelgi ársins,“ segir í tilkynningu frá FÍB.

Víða um land verða verkstæði opin vegna neyðarþjónustu og bílaumboð og stærri varahlutasalar hafa skipulagt bakvaktir vegna varahlutaafgreiðslu fyrir milligöngu FÍB.

Skrifstofa FÍB, sími 414-9999, hefur milligöngu varðandi aðstoðarbeiðnir um verslunarmannahelgina og þar verður vakt frá föstudegi til síðdegis á mánudag.