Efla liðsandann Landsliðsmenn hafa komið oft saman að undanförnu til að efla liðsandann og undirbúa sig fyrir Heimsleikana í Berlín. Myndin var tekin þegar landsliðið var fyrst kynnt en mannabreytingar hafa síðan orðið.
Efla liðsandann Landsliðsmenn hafa komið oft saman að undanförnu til að efla liðsandann og undirbúa sig fyrir Heimsleikana í Berlín. Myndin var tekin þegar landsliðið var fyrst kynnt en mannabreytingar hafa síðan orðið. — Morgunblaðið/Styrmir Kári
[ Smellið til að sjá stærri mynd ]
Sviðsljós Helgi Bjarnason helgi@mbl.is Reiknað er með að Heimsleikar íslenska hestsins sem hefjast í Berlín á morgun verði í röð stærstu leikanna til þessa, þeir stærstu ef vel tekst til.

Sviðsljós

Helgi Bjarnason

helgi@mbl.is

Reiknað er með að Heimsleikar íslenska hestsins sem hefjast í Berlín á morgun verði í röð stærstu leikanna til þessa, þeir stærstu ef vel tekst til. Mikill áhugi er meðal hestamanna og hestaáhugafólks og skipuleggjendur gera einnig margt til að ná til borgarbúa þannig að búast má við tugþúsundum áhorfenda, fleirum en sést hafa á síðustu heimsmeistaramótum. Áætlað er að nokkuð á annað þúsund Íslendingar sæki leikana.

Heldur dauft hefur verið yfir sölu og útflutningi íslenskra reiðhesta undanfarin ár. Vonast hestamenn til að mótið í Berlín verði til að koma málum á hreyfingu. Mikið er lagt undir því fjöldi hesta er sendur út til sýninga og keppni án þess að þeir hafi verið seldir fyrirfram.

„Mótið sem haldið var í Þýskalandi 1999 var stórt og öflugt. Mér heyrist menn hafi væntingar um að slík straumhvörf verði nú. Ég veit ekki hvort það verður en veit þó að þetta verður vel skipulagt og gott mót með frábærum knöpum og hrossum,“ segir Haraldur Þórarinsson, formaður Landssambands hestamannafélaga (LH).

Krafa um árangur

Mótið hefst á morgun og lýkur á sunnudeginum eftir rúma viku.

Keppt verður um níu heimsmeistaratitla í hestaíþróttum, eins og verið hefur undanfarin ár, auk þess sem sérstök keppni verður í ungmennaflokki og sýnd verða og dæmt bestu kynbótahrossin sem þátttökulöndin hafa tök á að senda.

Ísland er upprunaland íslenska hestsins og því eru gerðar kröfur um árangur. Íslendingar unnu þrjá titla síðast og fjóra á mótinu þar á undan. Frá því farið var að keppa um níu titla hefur Ísland unnið 21 heimsmeistaratitil samtals en fimm aðrar þjóðir unnið samtals 25 titla. Íslendingar hafa einnig oftast verið efstir í íþróttakeppni ungmenna, þótt hlutfallið sé mun lægra en í aðalkeppninni, og á kynbótasýningunum.

Ekki er sjálfgefið að þessi árangur náist alltaf. Ræktun hefur aukist og batnað í Evrópulöndum og það skilar fleiri gæðingum auk þess sem margir af bestu hestunum úr ræktuninni hér heima eru seldir úr landi og geta þá erlendir knapar keppt á þeim á Heimsleikum. Þá er reiðmennskan í stöðugri framför.

Liðsstjóri landsliðsins og þeir sem að verkefninu standa binda vonir við að fleiri titlar vinnist en á síðasta móti. Breytingar sem gera þurfti á landsliðinu sem valið hafði verið eru þó taldar veikja það heldur. Þannig hefur Daníel Jónsson sem náð hefur góðum árangri í mótum erlendis á Oliver frá Kvistum orðið að draga sig út úr liðinu vegna veikinda hestsins. Þá þurfti Eyjólfur Þorsteinsson að fara með varahest. Haukur Tryggvason kemur þó sterkur inn af bekknum og öflugir hestar koma í stað þeirra sem heltust úr lestinni. Þá á liðsstjórinn möguleika á að nota knapa sem skráðir eru í ungmennaflokkinn ef hann telur þá og hestana eiga möguleika á sigri. Það gæti til dæmis átt við um Konráð Val Sveinsson og Þórdísi frá Lækjarbotnum í skeiðgreinum og raunar fleiri.

Tekst Jóhanni að verja titilinn?

Spennandi verður að fylgjast með töltkeppninni og hvort Jóhanni Rúnari Skúlasyni tekst að vinna tölthornið enn einu sinni. Þjóðverjinn Karl Zingsheim mun mæta með Dag og reyna að hefna fyrir ósigurinn á síðasta móti. Það var æsispennandi keppni þar sem Jóhann hafði betur. Héðan að heiman kemur Hinrik Bragason fullur sjálfstrausts með Smyril frá Hrísum eftir mjög góðan árangur á mótum.

Jakob Svavar Sigurðsson og Alur frá Lundum 2 eru líklegir til árangurs í fimmgangi, miðað við gengi þeirra á mótum hér heima. Þeir þurfa þó að vinna núverandi heimsmeistara, Magnús Skúlason sem keppir fyrir Svía á Hraunari frá Efri-Rauðalæk, og fleiri góða keppinauta.

Íslendingar eiga vænlega fulltrúa í flestum greinum en ekki er ráðlegt að telja verðlaunin fyrr en þau hafa verið hengd um háls knapanna. Í þessari íþrótt eins og öðrum getur dagsformið ráðið miklu og alltaf verða óvænt úrslit.

Íslenska liðið hefur unnið liðabikarinn sem veittur hefur verið á tvennum síðustu heimsleikum og þar telur heildarárangur landsliðsins. Það er staðfesting þess að íslenska liðið stóð sig best á þessum mótum. Hafliði Halldórsson liðsstjóri er ekki á því að láta liðabikarinn vera lengur en HM-vikuna í Þýskalandi.

Ýtt undir ungmennin

Bestu ungmennin hafa verið heiðruð á Heimsleikum frá 1999 og frá 2003 hafa þátttökulöndin mátt bæta þremur ungmennum við landslið sín. Þau hafa tekið þátt í íþróttakeppninni með fulloðnu knöpunum en þau efstu verið verðlaunuð sérstaklega. Nú er meiri áhersla lögð á unga fólkið. Riðin verða sérstök úrslit í helstu greinum og liðunum er heimilt að tefla fram fimm ungmennum. Íslendingar eiga góða fulltrúa, þar á meðal tvo stórefnilega 16 og 17 ára unglinga, systkinasynina Konráð Val Sveinsson og Gústaf Ásgeir Hinriksson.

Kynbótasýningar hafa verið á Heimsleikum frá 1985. Íslendingar hafa oft átt hæst dæmdu hrossin enda hafa þeir haft yfirburði í ræktun. Það háir hins vegar liðinu að erfitt er að fá eigendur bestu hrossanna hér heima til að senda þau út vegna þess að þau eiga ekki afturkvæmt. Því þarf oft að fara niður listann og leita til eigenda hrossa sem flutt hafa verið úr landi.

Endar ná saman

Það er mikið verkefni og dýrt að senda landsliðið til keppni í Berlín. Aðeins sá hluti sem Landssamband hestamannafélaga ber nemur hátt í þrjátíu milljónum króna. Haraldur Þórarinsson, formaður LH, segir að fjárhagsdæmið sé að ganga upp. Hann þakkar það öflugum bakhjörlum landsliðsins, stuðningi frá hinu opinbera og síðast en ekki síst duglegri landsliðsnefnd sem vinni mikið sjálfboðaliðsstarf.

Heimsleikar íslenska hestsins

Evrópumót verða heimsleikar

Alþjóðleg mót fyrir íslenska hestinn hafa verið haldin frá 1970. Þau eru nú haldin annað hvert ár, á móti Landsmóti hestamanna á Íslandi. Fyrsta Evrópumótið var haldið árið eftir að FEIF, alþjóðasamtök um íslenska hestinn voru stofnuð.

Gunnar Bjarnason, hrossaræktarráðunautur og frumkvöðull í útflutningi íslenskra reiðhesta, boðaði til stofnfundarins í nafni Búnaðarfélags Íslands og var kjörinn varaformaður samtakanna. Gunnar hafði í tuttugu ár unnið að uppbyggingu félagskerfis og mótahalds í löndum Evrópu til að undirbyggja hestaútflutninginn. Taldi þá þróun mála það langt komna að tímabært væri að efna til Evrópukeppni. FEIF er þýsk skammstöfun á heitinu Evrópusamband vina íslenska hestsins og felst í því ákveðin yfirlýsing.

Á fyrsta Evrópumótinu sem haldið var í Aegidiensberg í Þýskalandi voru 26 þátttakendur frá sex löndum. Íslendingar voru með frá upphafi og urðu fyrir vonbrigðum að ná ekki að sigra á fyrstu mótunum. Síðan fjölgaði í samtökunum og eru nú átján þjóðir aðilar, Bandaríkin og Kanada auk Evrópuþjóðanna. Með vísan til breiðari aðildar var heiti mótanna breytt árið 1991 í Heimsmeistaramót eða Heimsleika íslenska hestsins.

Kynbótasýningar voru hafnar 1985 og eru sérstakar sýningar innan vébanda leikanna. Þá hafa dyrnar smám saman verið opnaðar betur fyrir ungmenni, 16-21 árs.

Íslendingar ríða í gegnum Brandenborgarhliðið

Nokkrir Íslendingar taka þátt í lokaspretti boðreiðarinnar miklu til Berlínar í fyrramálið. Tekið verður á móti hestamönnunum á torginu við Brandenborgarhliðið í miðborg Berlínar. Búist er við að allt að 400 hestar verði með.

Reiðin í gegnum Brandenborgarhliðið er síðasti áfanginn í yfir mánaðarlangri boðreið hestamanna, úr þremur nágrannalöndum og í gegnum Þýskaland. Leiðirnar þrjár koma saman í Berlín þar sem Heimsleikarnir eru haldnir. Tilgangurinn er að gefa hestaáhugafólki möguleika á að taka þátt í Heimsleikunum með þessum hætti og bera fána og kefli frá Austurríki, þar sem síðasta mót fór fram, til Berlínar með svipuðum hætti og hlaupið er með ólympíueldinn.

Fulltrúar aðildarlanda FEIF, alþjóðasamtaka um íslenska hestinn, ríða lokaáfangann með Þjóðverjum. Fulltrúar Íslands verða Dorrit Moussaieff forsetafrú, Gunnar Sturluson, varaforseti FEIF, Haraldur Þórarinsson, formaður LH, og Sigurborg Daðadóttir yfirdýralæknir.

Forsetahjónin verða í einkaheimsókn í Berlín þennan dag. Ólafur Ragnar Grímsson forseti og Klaus Wowereit, borgarstjóri Berlínar, ávarpa hestamennina við Brandenborgarhliðið.

Sumir hestamannanna ríða síðan áfram til Karlshorst-hestaíþróttasvæðisins í austurhluta Berlínar þar sem vegleg opnunarathöfn hefst klukkan 15, með miklum hestasýningum.

Sigurður Ingi Jóhannsson landbúnaðarráðherra verður sérstakur gestur FEIF á Heimsleikunum og mun meðal annars afhenda verðlaun um næstu helgi þegar úrslit verða í flestum greinum.

Skráðir til keppni
» 163 knapar/hestar eru skráðir til keppni á Heimsleikum íslenska hestsins, í keppni fullorðinna og ungmenna. Þar með eru taldir varaknapar.
» Þátttakendur eru frá 16 löndum. Flestir frá Íslandi, Noregi, Danmörku, Svíþjóð, Þýskalandi, Austurríki og Hollandi.
» 44 hross eru skráð á kynbótasýningu, frá 12 löndum. Þar á meðal er eitt frá Kanada og annað frá Slóveníu. Er þetta mesta þátttaka sem verið hefur í kynbótasýningu á Heimsleikum.