[ Smellið til að sjá stærri mynd ]
UniKat er ný verslun á horni Frakkastígs og Laugavegs sem selur vandaðar hönnunarvörur fyrir börn og fullorðna. Verslunin, sem var stofnuð í sumar, er rekin af íslenskum hönnuðum og tveimur vefverslunareigendum. Sigurborg Selma Karlsdóttir sigurborg@mbl.is
Við erum átta hluthafar að opna búð með vönduðum hönnunarvörum, bæði vörum sem við höfum hrifist af á sýningum og ferðalögum og svo náttúrlega vörum sem við höfum sjálfar hannað og unnið. Okkur langar að búa til fallega búð með góðri stemningu þar sem við getum boðið upp á það sem okkur þykir fallegast og skemmtilegast,“ segir Elín Hrund Þorgeirsdóttir, ein af stofnendum verslunarinnar UniKat. UniKat reka níu íslenskar konur, þær Bríet Ósk Guðrúnardóttir, Elín Hrund Þorgeirsdóttir hjá Dýrindi, Sonja Bent, Elena K. Pétursdóttir, Steinunn Vala Sigfúsdóttir hjá Hring eftir hring, Nína Björk Hlöðversdóttir, Ólöf Jakobína Ernudóttir og Guðbjörg Káradóttir hjá Postulínu og Hlín Reykdal.

Elín segir að sig hafi lengi dreymt um að stofna búð og þegar þær stöllur duttu niður á fallega húsnæðið á Frakkastígnum hafi tækifæri gefist en Elín telur það jafnframt kost að geta rekið búðina allar saman.

„Við erum flestar að gera þetta í fyrsta skipti. Þetta er búið að vera ofsalega skemmtilegt ferli og við erum enn að læra, reka okkur á og hvetja hver aðra áfram. Það sem gerir þetta svo skemmtilegt er samstarfið; við lærum mikið hver af annarri og skiptumst á skoðunum. Það getur verið erfitt að opna verslun einn og sjálfur og þess vegna stukkum við á þetta tækifæri, að geta gert þetta saman. Það eiginlega gerði það að möguleika að við gátum farið út í þetta ævintýri,“ útskýrir Elín Hrund og bætir við að það sé mikil vakning fyrir gæðavörum.

Búðin er afskaplega litrík og skemmtilega innréttuð. Elín segir það góðan kost við húsnæðið að við það sé skemmtilegt port og það sé rétt við Laugaveginn. „Það er frábær stemning í miðbænum og ennþá margir ferðamenn sem koma. Frakkastígurinn er miklu fjölfarnari gata en ég hélt,“ segir Elín og hlær.