Stím-málið Lárus Welding, fyrrverandi bankastjóri Glitnis, er einn ákærðu.
Stím-málið Lárus Welding, fyrrverandi bankastjóri Glitnis, er einn ákærðu. — Morgunblaðið/Eggert
Þorsteinn Ásgrímsson thorsteinn@mbl.

Þorsteinn Ásgrímsson

thorsteinn@mbl.is

Í vitnaleiðslum í Stím-málinu svokallaða fyrir Héraðsdómi Reykjavíkur í gær kom fram að Þorsteinn Már Baldvinsson, forstjóri Samherja, væri með réttarstöðu sakbornings í máli sem er nú til rannsóknar hjá embætti saksóknara.

Vitnaleiðslan fór fram í gegnum síma, en þegar Símon Sigvaldason, dómsformaður, kynnti Þorsteini réttindi sín tók hann fram að samkvæmt upplýsingum sínum hefði hann réttarstöðu sakbornings í öðru máli sem væri til rannsóknar hjá sérstökum saksóknara. Þorsteinn bar vitni í Stíms-málinu vegna þess að Samherji hafði verið áætlaður hluthafi í Stími á sínum tíma, þótt félagið hefði síðar dregið sig úr þeirri fjárfestingu.

Man ekki eftir smáatriðum

Samkvæmt upplýsingum mbl.is var dómari að vísa til rannsóknar sérstaks saksóknara á máli sem tengist falli Glitnis, en Þorsteinn Már var stjórnarmaður bankans frá febrúar 2008 fram í október það sama ár. Tekið skal fram að engin ákæra hefur verið gefin út í umræddu máli sem er enn til meðferðar hjá embættinu, en Þorsteinn er með stöðu sakbornings á meðan.

Við yfirheyrslu saksóknara var hann nokkrum sinnum spurður um mál sem tengjast Stími, til dæmis um hver hefði hringt í hann á árunum 2007 og 2008. Sagði Þorsteinn að þetta væru atriði sem hefðu gerst fyrir meira en 8 árum og hann gæti með engu móti munað svona smáatriði.

Samherji var lengi til rannsóknar hjá Seðlabankanum vegna gruns um brot gegn lögum um gjaldeyrishöft. Sérstakur saksóknari felldi málið aftur á móti niður fyrr í haust.

Á þriðja tug manna báru vitni fyrir dómi í Stím-málinu í gær. Meðal vitna voru mörg þekkt nöfn úr viðskiptalífinu bæði fyrir og eftir hrun, s.s. Jón Ásgeir Jóhannesson, Jón Sigurðsson, Þorsteinn M. Jónsson og Skarphéðinn Berg Steinarsson. Vitnaleiðslur munu halda áfram í dag og á morgun en í heildina eru 52 vitni á vitnalista málsins, þar á meðal Magnús Pálmi Örnólfsson, fyrrverandi yfirmaður eigin viðskipta Glitnis, en hann samdi við sérstakan saksóknara um að bera vitni í málinu gegn friðhelgi frá lögsókn.