29. maí 1999 | Fólk í fréttum | -1 orð

Söngkonan Alda Björk Ólafsdóttir

Blóð, sviti og tár á þrautargöngu til frægðar Fyrir rúmu ári sló Alda Björk rækilega í gegn í Bretlandi en hafði fram að því

ÞAÐ ER liðin tíð að tónlistarmenn geti gengið inn til útgefenda, sungið fyrir þá nokkur lög og slegið í gegn um leið, líkt og Elvis Presley og fleiri rokkarar gerðu á árum áður. Í dag er tónlistarbransinn þrotlaus vinna þar sem höfnun er daglegt brauð og samkeppnin er harðari en margan grunar.
Söngkonan Alda Björk Ólafsdóttir Blóð, sviti og tár á þrautargöngu til frægðar



Fyrir rúmu ári sló Alda Björk rækilega í gegn í Bretlandi en hafði fram að því verið svo til óþekkt hér heima. Margir veltu því fyrir sér hver hin ljóshærða huldukona væri og hvar hún hefði alið manninn. Sunna Ósk Logadóttir náði í fingrafaraduftið og stækkunarglerið og yfirheyrði Öldu er hún dvaldi hérlendis nýlega. ÞAÐ ER liðin tíð að tónlistarmenn geti gengið inn til útgefenda, sungið fyrir þá nokkur lög og slegið í gegn um leið, líkt og Elvis Presley og fleiri rokkarar gerðu á árum áður. Í dag er tónlistarbransinn þrotlaus vinna þar sem höfnun er daglegt brauð og samkeppnin er harðari en margan grunar. Alda gaf nýverið út breiðskífuna "Out of Alda" eftir glimrandi árangur smáskífunnar "Real Good Time" á breska vinsældalistanum. En slíkt er engin ávísun á heimsfrægð og eins víst að baráttan sé rétt að byrja.

Heppni skiptir mestu máli

"Að vera tónlistarmaður getur verið mjög óréttlátt starf, hvort sem það er hérna heima eða úti," segir Alda um þrautargöngu sína til frægðarinnar. "Ég hef barist eins og brjálæðingur í tíu ár fyrir þeim árangri sem ég hef náð í dag. Ég hef oft verið spurð að því hvort að það breyti einhverju að vera Íslendingur, en það breytir engu. Heppni er það sem skiptir mestu máli, þ.e. hvort þú sért á réttum stað á réttum tíma. Þá er jú ágætt að hafa eitthvað til að selja líka," segir Alda hlæjandi og bætir við að stundum virðist það hreinlega ekki skipta máli. "Þetta er tómur klíkuskapur, snýst allt um að hafa réttu samböndin. Ég var aldrei í neinni klíku, hvorki hér heima né í Bretlandi. Ég hef þurft að berjast fyrir mínum árangri sjálf."

Ólíkt mörgum stúlkum dreymdi Öldu ekki um að verða söngkona í æsku. "Alla tíð hefur verið mikill söngur og tónlist í kringum mig. Þegar fjölskyldan fór í bíltúr til Hveragerðis á sunnudögum sátum við systkinin þrjú í aftursætinu og sungum alla leiðina," rifjar hún upp og brosir. "Hins vegar hvarflaði það ekki að mér að ég gæti haft atvinnu af söngnum."

Ætlaði í lögfræði

Á unglingsárunum flutti fjölskyldan til Svíþjóðar og Alda var færð upp um bekk í skólanum. "Þegar ég lauk námi ákvað ég að nota það forskot sem ég hafði á jafnaldra mína og taka mér frí áður en ég færi aftur í skóla en á þeim tíma var ég staðráðin í því að verða lögfræðingur. Þetta frí varð afdrifaríkt og líf mitt tók óvænta stefnu. Ég sá Carolu Haeggkvist syngja fyrir hönd Svíþjóðar í Eurovision og á meðan ég horfði á hana var eins og eitthvað hefði sprungið innra með mér og ég ákvað þar sem ég stóð að verða söngkona."

Áður en langt var um liðið var Alda gengin til liðs við búlgarska hljómsveit sem spilaði á skemmtiferðaskipum og með henni söng hún á nær hverju kvöldi í tæp tvö ár. Þá ákvað hún að flytja ásamt fjölskyldunni aftur til Íslands. "Ég tók mér frí frá söngnum og vann á Svörtu pönnunni í nokkra mánuði." Söngþráin kom þó fljótt upp aftur og þá fór Alda að semja tónlist sjálf.

Nýliðun erfið

"Á þeim tíma virtist vera lokað á nýja söngvara í tónlistarheiminum hérlendis. Það voru nokkur nöfn sem voru þekkt og það var mjög erfitt fyrir nýja söngvara að troða sér inn í þann hóp." Alda gekk á milli manna og reyndi að koma sér á framfæri og stofnaði að lokum hljómsveit með Mána Svavarssyni og fleirum og á sama tíma fór hún að syngja með Sverri Stormsker. "Síðan kom Grétar [Örvarsson] til sögunnar og ég gekk til liðs við hann. Sú hljómsveit varð síðar Stjórnin."

Útþráin blundaði alltaf í Öldu og eftir farsælt sumar með hljómsveitinni ákvað hún að leggja land undir fót og freista gæfunnar. "Ég ætlaði mér frá upphafi að fara annaðhvort til Bandaríkjanna eða Bretlands og gefa þar út tónlist," segir Alda ákveðin. "Ég sá ekki fram á að geta gert hér þá hluti sem ég ætlaði mér, ekki það að ég hafi ekki viljað búa á Íslandi því ég elska þetta land. En ég var ung og brann af metnaði og því var best að slá til á þeim tíma sem ég fór, því þegar maður verður eldri er hætta á að festast í einhverju fari. Ég var hrædd um að þannig myndu málin þróast með Stjórninni og því kvaddi ég sveitina."

Alda lagði upp í óvissuferð og lenti í London þar sem hún þekkti ekki sálu, með tvær ferðatöskur og þúsund pund í vasanum. "Mér hafði verið bent á tímarit þar sem tónlistarmenn auglýstu eftir söngkonum," rifjar Alda upp. Það fyrsta sem hún gerði í fyrirheitna landinu var því að kaupa eintak af Melody Maker og Malcolm Mehyer, samstarfsmaður hennar æ síðan, var fyrsta manneskjan sem hún svaraði auglýsingu frá. "Við höfum verið saman í mörgum hljómsveitum og reynt hitt og þetta en allan tímann vorum við að leita að samningum," segir Alda og bætir við að það sé slítandi og erfið vinna er hafi þó að lokum borið árangur.

Langþráður samningur

"Með hljómsveitinni Exodus fengum við okkar fyrsta plötusamning við Jive-útgáfuna og vorum að vonum himinlifandi. En þegar við höfðum tekið upp "Chill out", okkar fyrsta smáskífulag, þá létu þeir re-mixa það sem danslag og síðan ákváðu þeir að sú útgáfa yrði á a-hlið smáskífunnar sem þýddi að útvarpsstöðvarnar vildu ekki spila það. Við vorum mjög ósátt og smáskífan okkar seldist aðeins í fáum eintökum. Þeir ætluðu síðan að leika sama leikinn aftur en þá neituðum við að taka þátt í þessu. Upp úr því hætti hljómsveitin og ég ákvað að verða sóló-söngkona," segir Alda sem varla sér eftir þeirri ákvörðun. "Ári síðar fékk ég samning hjá Wild Star-útgáfufyrirtækinu. Þá hafði ég verið að í níu ár þar til ég fékk loks samning hjá framsýnu fyrirtæki sem sá hvað ég var að gera og hafði trú á mér."

Gagnrýnisraddir hafa heyrst um að tónlist Öldu sé í ætt við þá sem Spice girls og aðrar léttsveitir leika. Alda segir af og frá að hún reyni að líkja eftir þeim. "Ég er sátt við mína tónlist. Ég flyt popptónlist af því að ég hef gaman af henni og ég ætla ekkert að biðjast afsökunar á því. Það er viss stíll á tónlist þeirra íslensku söngkvenna sem hafa náð góðum árangri erlendis en ég ætla ekki að fara þá leið," segir Alda ákveðin. "Ég tel að mikilvægast sé að taka sjálfan sig passlega mikið alvarlega. Ég syng ekki um að stökkva út í sjó því lífið sé svo ömurlegt, það er alltaf sólskin hjá mér. Kannski verður næsta plata aðeins dekkri, hver veit?"

En skyldu árin í Bretlandi hafa verið "Real Good Time"?

Alda hugsar sig um andartak áður en hún svarar. "Þetta hefur verið stanslaus vinna og að mörgu leyti langur og erfiður tími. En einnig hefur þetta verið góður tími, sennilega af því að ég er svo bjartsýn að eðlisfari," segir hún og brosir hugsi. "Oft var ég spurð hvort ég ætlaði ekki að fara að hætta þessu og koma heim en ég hlýt að vera svona þrjósk. Það skipti aldrei máli hversu niðurdregin eða ráðþrota ég var, ég reif mig alltaf upp aftur. Ég gefst nefnilega ekki svo auðveldlega upp," segir Alda að lokum og brosir dularfullu brosi.

Morgunblaðið/Þorkell "ÉG hef barist eins og brjálæðingur í tíu ár fyrir þeim árangri sem ég hef náð í dag."

"OFT var ég spurð hvort ég ætlaði ekki að fara að hætta þessu og koma heim en ég hlýt að vera svona þrjósk."

"ÉG syng ekki um að stökkva út í sjó því lífið sé svo ömurlegt, það er alltaf sólskin hjá mér."

"ÉG flyt popptónlist af því að ég hef gaman af henni og ég ætla ekkert að biðjast afsökunar á því."

Aðgangsupplýsingar

Notandi:Þú ert ekki innskráð(ur).
Greinin: Þessi grein er ókeypis þar sem hún er eldri en þriggja ára.
Morgunblaðið - fyrsta forsíðan

Morgunblaðið hjá Landsbókasafni

Á vefnum timarit.is er að finna stafrænt safn Landsbókasafns yfir helstu dagblöð og tímarit landsins. Þetta er eina leiðin til að leita að efni úr Morgunblaðinu frá því fyrir 1986.