BRIDS - Umsjón Guðmundur Páll Arnarson

HÉR er spil, sem hefur á sér yfirbragð einfaldleikans, en "lát ei blekkjast" - í því leynist gildra, sem vissara er að varast:

Austur gefur; enginn á hættu.

Austur á nánast örugglega spaðaásinn, svo fátt virðist eðilegra en að spila trompi tvisvar að KD. Sé legan ekki þeim mun verri ætti það að duga til að halda vörninni í þremur slögum - spaðaás og tveimur á hjarta. Er þá hugmyndin að fara inn í borð á tígulás til að spila spaða?

Þá gæti þetta gerst: Suður fær á spaðakóng og spilar aftur tígli á blindan og spaða þaðan. En nú tekur austur á trompásinn og kannar viðbrögð makkers við hjartakóng. Hann fær kall, spilar þá undan hjartaás og tígull frá vestri tryggir vörninni fjórða slaginn á spaðagosa. Svolítið neyðarlegt.

Er til mótleikur? Auðvitað. Sagnhafi byrjar á því að slíta samgang varnarinnar í hjartanu með því spila sjálfur hjarta í öðrum slag. Jafnvel þótt vörnin svari með tígli er slagurinn tekinn í borði og spaða spilað á kóng. Síðan hjarta aftur og nú er sambandið í hjartalitnum slitið.