BMW M2 ofursportbíllinn er með 600 hestafla vél.
BMW M2 ofursportbíllinn er með 600 hestafla vél.
BMW hefur í hyggju að smíða ofursportbíl sem á eftir að vekja verulega athygli þegar og ef hann kemur á markað. Hér er um að ræða tveggja sæta bíl sem sagt er að verði nefndur M2.
BMW hefur í hyggju að smíða ofursportbíl sem á eftir að vekja verulega athygli þegar og ef hann kemur á markað. Hér er um að ræða tveggja sæta bíl sem sagt er að verði nefndur M2. Hann verður með 3,0 lítra, 600 hestafla, V10 Formula 1-keppnisvél, og fyrstu vísbendingar benda til að verðið verði einhvers staðar í námunda við 30 milljónir ÍSK. BMW fullyrðir að þetta verði fyrsti sportbíllinn sem gefi ökumönnum reynslu í líkingu við akstur Formula 1-bíls. Bíllinn á að fara í framleiðslu í júlí 2002 og eru margir sannfærðir um að M2 verði konungur ofursportbílanna. BMW hefur áður smíðað ofursportbílinn M1 sem var með V12-vél en nýi bíllinn er sagður eiga eftir að fá mun harðari samkeppni frá sambærilegum bílum frá Audi, Volkswagen og Bugatti. Nýlega var greint frá Rosemayer-hugmyndabílnum frá Audi á þessum síðum sem verður með V16-vél og W12 VW-ofursportbílunum. Bugatti stefnir að framleiðslu á Veyron 16/4 árið 2003. Á sama tíma hefur Mercedes-Benz staðfest að SLR-ofursportbíllinn verði smíðaður með aðstoð McLaren og Porsche ætlar einnig að setja Carrera GT í takmarkaða framleiðslu. BMW fer í samkeppnina ekki einvörðungu með gríðarlega aflmikla vél heldur einnig róttækan undirvagn sem að mestu er smíðaður úr magnesíum og áli og yfirbyggingu úr kolefnatrefjum. Bíllinn vegur því litlu meira en 1.200 kg sem er um 50 kg meira en McLaren F1-keppnisbíllinn. Bíllinn verður afturhjóladrifinn með sex gíra kassa og háþróuðu veggripsstýrikerfi. Bíllinn á að ná 100 km hraða á undir fjórum sekúndum. Líklegt er að keramikbremsur verði í bílnum.