María Þórðardóttir leikur Tinnu kvenréttindakonu með meiru.
María Þórðardóttir leikur Tinnu kvenréttindakonu með meiru.
[ Smellið til að sjá stærri mynd ]
TINNA Tómas er ung kona með skoðanir, enda umhverfi hennar stráð hetjudáðum, átökum og sálartónlist í hæsta gæðaflokki. Þrátt fyrir að vera hægrisinnuð og taka öllu sem frá Ameríku kemur fegins hendi verður hún ástfangin af manni af allt öðru sauðahúsi.

TINNA Tómas er ung kona með skoðanir, enda umhverfi hennar stráð hetjudáðum, átökum og sálartónlist í hæsta gæðaflokki. Þrátt fyrir að vera hægrisinnuð og taka öllu sem frá Ameríku kemur fegins hendi verður hún ástfangin af manni af allt öðru sauðahúsi. Verður það ástin eða hugsjónirnar sem hún velur?

Enginn er betur til þess fallinn að svara þessari spurningu en María Þórðardóttir Verslunarskólanemi, dansari og nú söngvari og leikari líka. Hún fer með hlutverk Tinnu í söngleik Verslunarskólans, Slappaðu af, sem frumsýndur verður í Borgarleikhúsinu í kvöld. Þetta er í fjórða og því síðasta sinn sem María tekur þátt í söngleik skólans því hún tekur stúdentspróf í vor.

Stjórnmálaskotinn söngleikur

"Ég fór ekki í Versló með það í huga að taka þátt í söngleikjunum," segir María hin brosmilda, "heldur af því að þarna er nám sem ég hef áhuga á. Þátttakan í söngleikjunum var bara algjör bónus!"

Söngleikurinn Slappaðu af er að sögn Maríu stjórnmálaskotinn. Hann á að gerast á Íslandi á sjöunda áratugnum og koma stórviðburðir á borð við fyrstu skref mannsins á tunglinu og fyrstu útsendingu Ríkissjónvarpsins við sögu.

En snúum okkur aftur að Tinnu Tómas og ástamálum hennar. "Hún á kærasta úr hægra-liðinu en verður svo ástfangin af manni úr því vinstra. Á endanum gerir hún uppreisn gegn karlmönnum eins og þeir leggja sig og úreltum viðhorfum og stofnar kvenréttindahreyfingu," útskýrir María.

Í söngleiknum, sem gerður er eftir handriti Felix Bergssonar og er í leikstjórn félaga hans Gunnars Helgasonar, mæðir mikið á Maríu, en alls taka um áttatíu nemendur Verslunarskólans þátt í sýningunni. Tinna á það nefnilega til að bresta í söng eins og gengur og gerist í söngleikjum og svo finnst henni gaman að dansa. María æfði líka dans í Jazzballettskóla Báru í mörg ár og kann því ófá danssporin. En hún og aðrir dansarar sýningarinnar njóta leiðsagnar Guðfinnu Björnsdóttur danshöfundar.

Kemur ekki niður á náminu

María og félagar hennar í Versló hafa æft nánast sleitulaust síðan í nóvember. Æfingarnar hafa síðan orðið þéttari eftir að hópurinn fór að æfa í Borgarleikhúsinu í janúar. María hefur þó ekki miklar áhyggjur af að æfingar og sýningar komi niður á náminu. "Maður verður bara að skipuleggja sig vel. Þetta er í fjórða sinn sem ég er með og ég er búin að læra inn á hvernig best er að gera þetta. Mikilvægast er að mæta í tíma og fylgjast vel með, það skiptir ótrúlega miklu máli. Ég ætla sko ekki að láta stúdentsprófið verða fyrir neinu raski," segir María harðákveðin. Hún segist ekki tilbúin til að leggja leiklistina algjörlega á hilluna þó að dagar hennar í Versló séu brátt taldir. "Já, ég er komin með smáleiklistarbakteríu," viðurkennir hún brosandi. "Mér líður mjög vel á sviðinu og hef rosalega gaman af þessu."

María segir stemmninguna í kringum sýninguna hafa verið frábæra og ekki spilli fyrir að hafa menn á borð við Gunnar Helgason leikstjóra og Felix Bergsson handritshöfund sér til halds og trausts og lýsir hún þeim sem snillingum. "Hópurinn er góður og andinn frábær. Ég hlakka bara mjög til að byrja að sýna."