Matur | mbl | 3.7.2018 | 11:08

„Besta meðlæti fyrr og síðar“

Brakandi ferskur og tilbúinn. mbl.is/Eva Laufey

Máltíð er lítils virði ef meðlætið stendur ekki undir væntingum. Við erum stöðugt á höttunum eftir skemmtilegum útfærslum og greinilegt er að fleiri eru á sömu buxunum því Eva Laufey á heiðurinn að þessum dásemdarmaís sem hún segir að sé guðdómlega góður og bætti svo við að þetta væri besta meðlæti fyrr og síðar.

Grillaður maís í hvítlaukssmjöri

Það stytti upp í kortér í vikunni og þá var tilefni til þess að grilla, mig langar að skrifa langloku um veðrið og röfla en ég er að reyna að halda röflinu í lágmarki. Ég er samt orðin svo súr á þessu, en jæja, ég ætla að tala um góðan mat sem gleður! Ég grillaði maís í fyrsta sinn og ég skil raunverulega ekkert í sjálfri mér að hafa ekki prófað það fyrr, þetta var guðdómlega gott. Stökkur maís í hvítlaukssmjöri með fetaosti, radísum, ferskum kryddjurtum og límónusafa, namm!! Þið verðið hreinlega að prófa, ég lofa að þið eigið eftir að gera þetta aftur og aftur.

2 ferskir maísstönglar í hýðinu
Salt og pipar
Chipotle parmesan-krydd
50 g smjör
1 hvítlauksrif
Basilíka eða kóríander
Radísur
Fetaostur
1 límóna

Aðferð:

Flettið hýðinu á maísnum niður og látið stönglana liggja í köldu vatni í um það bil 15 mínútur.
Þerrið maísinn og kryddið með salti, pipar og Chipotle Parmesan-kryddinu.
Setjið smávegis af olíu í pott, saxið niður hvítlauksrif og létt steikið. Bætið smjörinu út í pottinn og bræðið. Hellið smjörinu yfir maísinn og veltið stönglunum vel upp úr smjörinu.
Grillið í 15-20 mínútur.
Berið fram með fetaosti, enn meira smjöri, smátt skornum radísum og ferskum kryddjurtum til dæmis basilíku eða kóríander. Kreistið einnig límónusafa yfir rétt áður en þið berið fram!