Á Hellissandi á Snæfellsnesi er að finna eitt krúnudjásnið í veitingahúsaflórunni sem er í túnfætinum við jökulinn. Þar hefur verið borinn fram hágæða sælkeramatur sem hefur verið eldaður af natni og ástríðu síðastliðin ár. Hér er um að ræða veitingastaðinn Viðvík sem er kominn á sölu. Þetta er fallegur og hlýlegur veitingastaður með stórbrotið útsýni en við blasir Snæfellsjökull, Breiðafjörðurinn og Krossavík sem lætur engan ósnortinn. Viðvík stendur í fallegu nýuppgerðu húsi við þjóðveginn og er mikið augnayndi. Húsið var byggt árið 1942 og á sér sögu.
Parið Gils Þorri Sigurðsson og Aníta Rut Aðalbjargardóttir eiga og reka veitingastaðinn Viðvík og hafa lagt metnað sinn og ástríðu í reksturinn frá upphafi. Þau segja á Facebook-síðu staðarins að nú sé komið að tímamótum hjá fjölskyldunni og breytingar séu fram undan. „Við höfum tekið mjög erfiða ákvörðun að setja Viðvíkina á sölu. Erum einstaklega stolt af þessum stað og þakklát fyrir árin okkar og hversu vel hefur gengið. Við munum alltaf hugsa hlýtt til þessa tíma og eigum yndislegar minningar þar, allt fólkið, starfsfólk, viðskiptavinir og fastakúnnar sem við höfum kynnst í gegnum Viðvík sem við erum svo þakklát fyrir. Vonum innilega að það sé einhver þarna úti sem muni vilja taka við rekstrinum og halda lífi áfram í húsinu. Tækifærin eru endalaus í Snæfellsbæ. En nú undirbúum við fjölskyldan næstu skref i okkar lífi og þökkum fyrir allan stuðning,“ segir þau Gils og Aníta Rut.
Þjóðgarðsmiðstöðin á Hellissandi er í næsta nágrenni. Fallegar gönguleiðir og framtíðaráform um baðaðstöðu í Krossavík. Gönguleið að tjaldsvæðinu. Nálægðin við fjöruna, hafið og Snæfellsjökul veita mikla möguleika og einstaka orku. Snæfellsnes og Snæfellsjökulsþjóðgarður er vinsæll ferðamannastaður.