„Taktíkin er eitthvað sem ég vil ekki tala um við blaðamenn,“ sagði Gernot Rohr landsliðsþjálfar Nígeríu á fréttamannafundi nígeríska landsiðsins í knattspyrnu sem nú stendur yfir á Volgograd Arena en Nígeríumenn mæta þar Íslendingum í 2. umferð riðlakeppni HM í knattspyrnu á morgun.
„Ég tala um hana við leikmennina. Við verðum með taktík til að vinna leikinn, en ég get ekki sagt hvaða taktík það verður. Við vorum með gott skipulag í síðasta leik en töpuðum leiknum samt sem áður. Það var ekki vegna mistaka í skipulaginu.
Við fengum á okkur tvö heimskuleg mörk, eitt sjálfsmark og eitt víti. Nú mætum við öðruvísi liði, Íslandi, og þurfum að aðlaga skipulagið að því,“ sagði Rohr.