Hlutur ferðaþjónustunnar í efnahagslífi landsins er orðin þannig að flestum er nauðsynlegt að fylgjast með þróuninni þar til að átta sig á breytingum í hagkerfinu. Breytingar á fjölda ferðamanna, minni nýting hótelherbergja og samdráttur í fjárfestingu vegna ferðaþjónustunnar eru fréttir sem skipta okkur miklu máli.
Þannig er ferðaþjónustan orðin lykilþáttur í greiningu þeirra sem spá um framvindu markaða og hagkerfisins hér á landi. Það sést best í nýrri hagspá hagfræðideildar Landsbankans. Þar segir að hægja muni á hagvexti á Íslandi samhliða aðlögunartímabili í ferðaþjónustu. Kannski ekki óvænt ályktun en við getum huggað okkur við að deildin telur ekki þörf fyrir neina sérstaka aðlögun eða að hagkerfið sé að fara að lenda illa.
Hrun eða brostnar væntingar
Um langt skeið hafa heyrst raddir sem spá hruni í ferðaþjónustunni. Á móti má spyrja hvernig lítur það hrun út? Er það hrun ef fjölgun ferðamanna er ekki nema 5% milli ára? Þegar ferðamannafjöldinn er komin yfir tvær milljónir á ári, þá er það þó fjölgun ferðamanna um sem nemur 50 þúsund! Eða er það hrun ef fjöldinn stendur í stað? Já, það eru sannarlega viðbrigði eftir að hafa upplifað 20 til 40 prósenta árlega aukningu lengi. En það er ekki ástand sem veldur hruni. Væntingar margar geta hins vegar orðið fyrir skaða. Líklega ættu margir að endurskoða áform sín um ný hótel eða ný þjónustufyrirtæki. Að minnsta kosti um sinn.
Í uppfærðri spá hagdeildar Landsbankans kemur fram að efnahagsástandið hér á landi sé á flesta mælikvarða mjög gott. Er því spáð að hagvöxtur á þessu ári verði 4,1 prósent sem er yfir sögulegu meðaltali hér á landi. Árin 2019 og 2020 hægi hins vegar allnokkuð á hagvexti og verði hann undir sögulegu langtímameðaltali, eða um 2,4 prósent bæði árin.
Spáin gerir ráð fyrir lítilsháttar fjölgun ferðamanna á næstu árum en ef ferðamönnum fækkar næstu misseri í stað þess að fjölga myndi það að öðru óbreyttu draga talsvert úr hagvexti í gegnum minni útflutning, minni einkaneyslu og minni fjárfestingu. „Uppsveiflunni í ferðaþjónustu er lokið og gera má ráð fyrir hægari og sjálfbærari vexti greinarinnar,“ segir í samantekt hagfræðideildar Landsbankans um þjóðhagsspána.
Bjargar HM málum?
En landkynning getur verið málið - auglýsa betur. Greiningardeild Arion banka benti á það í vikunni að björgun gæti komið úr óvæntri átt. Hugsanlega bjargar HM málum en eins og margir muna jók EM í Frakklandi og árangur Íslendinga þar mjög á ferðamannastrauminn. En hvaða efnahagslegu áhrif hefur aukinn áhugi á Íslandi? Jú, greiningardeild Arion-banka telur að aukin umfjöllun geti leitt til aukins ferðamannastraums til landsins, en þó með einhverri töf. Aukinn straumur ferðamanna leiðir svo til aukinna tekna fyrir þjóðarbúið, jákvæðari þjónustujafnaðar og þar af leiðandi meiri viðskiptaafgangs að öllu öðru óbreyttu. Þetta er þó sett fram með eðlilegum fyrirvörum.
En þetta bendir á þá einföldu staðreynd að stundum hefur landkynning komið óvænt upp í hendur okkar en nú í framtíðinni þurfum við líklega að hafa meira fyrir hlutunum. Það er það sem er líklega að fara að gerast í ferðaþjónustunni, tími áhugamennskunnar er liðin, nú reynir á menn í alvöru. Fagmennskan mun ráða úrslitum um hvernig okkur mun farnast næstu ár.
Það skal tekið fram að þau viðhorf sem birtast í þessum pistli eru eingöngu höfundar og á hans ábyrgð.