Nú er það staðfest að Ítalía hefur siglt inn í kreppu. Á sama tíma er ljóst að Evrópa í heild á við mikla efnahagslega erfiðleika að stríða vegna viðvarandir stöðnunar. Um leið hafa efnahagshorfur heimsins versnað.
Nýjar hagtölur fyrir Ítalíu birtust í vikunni, og kom þar í ljós að stöðugur samdráttur hefur verið í hagkerfi landsins seinni hluta ársins 2018 en vikið var að stöðnuninni á Ítalíu í pistli hér í haust. Jafnvel þó að samdrátturinn sé ekki mikill í prósentum talinn, eða einungis um 0,1-0,2%, þýðir hann þó að opinberalega er skollin á kreppa á Ítalíu. Þetta er í þriðja sinn síðan 2008 að slíkt gerist og er ein aðalástæða þess að skuldavandi ítalska ríkisins er nú talinn meiri en áður, þar sem minna mun innheimtast af sköttum en áætlanir gerðu ráð fyrir eins og leiðarahöfundur Morgunblaðsins bendir á í dag. Staða bankakerfisins ítalska er kapítuli út af fyrir sig en það hefur verið til umfjöllunar hér áður og með fylgir mynd af bankanum í Siena, Banca Monte dei Paschi di Siena S.p.A. (BMPS), sem rekur upphaf sitt allt aftur til ársins 1472 en er nú fallinn.
Giuseppe Conte, forsætisráðherra Ítalíu, reyndi að róa kollega sína í Evrópu á þriðjudaginn þegar hann fullyrti að samdrátturinn nú hefði ekkert með ákvarðanir ítölsku ríkisstjórnarinnar að gera. Frekar er hann tilbúin að kenna um viðskiptastríði Bandaríkjanna og Kína. Ítalskir neytendur virðast ekki taka mikið mark á honum en svartsýni þeirra hefur dregið verulega úr neyslu.
Svigrúm ECB minnkar
Evrópski seðlabankinn (European Central Bank) hefur undanfarin misseri reynt að styðja við efnahag evrulandanna og þá sérstaklega Ítalíu. Nú er ljóst að svigrúm bankans hefur minnkað og hann hefur dregið úr kaupum ríkisskuldabréfa sem hefur hingað til gefið einstaka evruríkjum tækifæri til að auka peningamagn í umferð og reyna að koma þannig hlutunum á hreyfingu. Skuldir ítalska ríkisins eru nú himinháar og ljóst að Ítalía á í vandræðum með að fjármagna sig án aðstoðar frá ECB. „Við erum með mjög viðkvæma efnahagsstöðu núna um leið og ECB er að draga sig út af markaðinum. Fyrir vikið er minna svigrúm fyrir pólitísk mistök,“ hefur New York Times eftir Katharinu Utermöhl, hagfræðingi hjá þýska tryggingafélaginu Allianz.
Allt þetta verða að teljast vond tíðindi fyrir núverandi ríkisstjórn Ítalíu, sem hafði fengið skammir frá Evrópusambandinu og verið rekin til baka með fjárlög. Leiðarahöfundur Morgunblaðsins bendir réttilega á tvöfeldnina í þeim ákvörðunum þar sem ríkisstjórn Frakklands fór einnig yfir viðmið Evrópusambandsins en þá heyrðist hvorki hósti né stuna frá embættismönnunum í Brussel.
Hvað sem því líður er staða Ítalíu ekki öfundsverð. Ítalska ríkið er stórskuldugt, hið fjórða skuldugasta í heimi, og eru skuldirnar 132% af þjóðarframleiðslu. Í upphæðum talið skulda Ítalir jafn mikið og Þjóðverjar sem reka margfalt stærra hagkerfi. Einungis Grikkir standa verr að því leyti. Flestir greinendur telja að samdráttarskeiðið á Ítalíu haldi áfram frameftir þessu ári.
Evrusvæðið í vanda
Helsta áhyggjuefnið fyrir forvígismenn Evrópusambandsins er þó ekki hver staða Ítalíu er ein og sér, heldur fremur það, að evrusvæðið í heild sinni náði sér ekki á strik seinni hluta ársins 2018. Meðalhagvöxtur svæðisins á síðasta ársfjórðungi 2018 var einungis 0,2% samkvæmt Eurostat og 0,3% innan Evrópusambandsins sem heildar. Þá er nýleg spá Alþjóðagjaldeyrissjóðsins ekki til að gleðja menn en þar er spáð snörpum samdrætti á evrusvæðinu og sérstaklega í Þýskalandi.
Í slíku umhverfi væri ekki gott fyrir Evrópusambandið ef Ítalía yrði fyrir enn frekari skakkaföllum í efnahagslífinu og það er ólíklegt að skuldavanda Ítala verði mætt af miklum skilningi af stjórnvöldum í Berlín, París og Brussel.
Hér hefur áður verið vikið að bók hagfræðingsins Ashoka Mody (Eurotragedy: A Drama in Nine Acts) en hann telur að Ítalía hafi aldrei átt að fá aðgang að evrunni. Viðvarandi samdráttur í landinu styður þá greiningu hans.