Oliver Schmidt, framkvæmdastjóri hjá Volkwagen (VW) í Bandaríkjunum, var í morgun dæmdur í sjö ára fangelsi og sektaður um 400.000 dollara fyrir aðild sína að dísilhneykslinu sem við VW er kennt.
Hneykslið varðar um 600.000 bíla frá VW-samsteypunni sem búnir voru búnaði til að blekkja mengunarmælingar með því að sýna á prófum mun minni losun gróðurhúsalofts en raunverulega átti sér stað.
Var Schmidt dæmdur fyrir brot á lögum um loftlagsmengun og sagði dómari í Detroit í Michigan að hann hafi verið höfuðpaurinn í blekkingartilraununum, en fyrir til viljun komst málið upp.
Oliver Schmidt er Þjóðverji og var framkvæmdastjóri umhverfis- og verkfræðiskrifstofu Volkswagen í Michiganríki á árunum 2012 til 2015. Hann var ákærður fyrir samtals 11 brot á hegningarlögum og stóð frammi fyrir allt að 169 ára fangelsisdómi hefðu ákærurnar allar verið teknar til greina af dómstólnum, að sögn Reuters-fréttastofunnar.
Hann komst hins vegar að samkomulagi við saksóknara sem féllu frá flestum liðum ákærunnar gegn játningu fyrir brotin sem eftir stóðu. Að lokinni afplánun verður hann rekinn úr landi.
Saksóknarar í Bandaríkjunum hafa stefnt átta af núverandi og fyrrverandi yfirmönnum Volkswagen en sex þeirra hafa hingað til ekki gefið sig fram.