Einn var sá bíll á Gefnarsýningunni sem dró til sín gesti eins og flugur á mykjuskán. Var hann í smærra lagi, smíðaður í Eistlandi, endurskapaður rafbíll í anda bíla frá fyrri tíð.
Hér er um að ræða Nobe 100, þriggja hjóla og þriggja sæta bíl með 210 kílómetra drægi á fullri rafhleðslu. Hann er þeirrar náttúru að uppfæra má hann og endurvinna. Fer því ekkert úr honum á haugana, telst hann því sjálfbær.
Takmark bílsmiðanna er að vekja fólk til vitundarvakningar og annarrar sýnar á bíla og ferðalög. Nobe er það allt; smíðaður úr smörtu efni og hleðslumálin leyst með lekkerri handtösku til að bera geyminn í inn í hús til hleðslu.
Reiknað er með að Nobe 100 komi á götuna síðsumars en eintakið mun kosta um 37.000 evrur, jafnvirði um 4,9 milljóna króna. Sá bíll verður með 210 km drægi og 110 km/klst topphraða. Tíu þúsund evrum meira þarf að borga vilji kaupandinn Nobe 100 GT-útgáfuna og njóta 260 km drægis og 139 km/klst topphraða hennar.
Þar er verið að tala um annað hvort 54 eða 72 kílóvött afls (72 eða 98 hestöfl) og fjögurra og fimm kílóvattstunda rafgeyma. Sjálfstæður rafmótor verður á hverju hjóli. Alls mun bíllinn vega 590 kíló og þakið má fyrirhafnarlítið taka af báðum fyrirhuguðum gerðum bílsins Nobe 100.
agas@mbl.is