Eins og Mbl.is greindi frá um helgina er hópur fokdýrra ofursportbíla í heimsókn á Íslandi um þessar mundir. Fyrst sást til bílanna í kjallara Hörpu, en síðan þá hafa þeir skotið upp kollinum hér og þar.
Ljósmyndari rakst á hluta sportbílaflotans í Tryggvagötu og stóðst ekki mátið að smella af nokkrum myndum er eigendur bílanna voru í þann mund að halda af stað í enn eitt ferðalagið.
Gangandi vegfarendur kunnu greinilega að meta þessi fallegu, fágætu og kröftugu ökutæki og mátti sjá suma reyna að ná nokkrum góðum myndum með snjallsímanum, eða smella af sjálfsmynd með föngulegan McLaren, Ferrari eða Aston Martin í bakgrunni.
Samkvæmt heimildum blaðsins samanstendur hópurinn af sterkefnuðum bílaáhugamönnum sem hafa gaman af að ferðast hingað og þangað um heiminn á ofursportbílunum. Vilja þeir annars ekki láta mikið á sér bera. Að sögn ljósmyndara mátti sjá, þegar eigendur bílanna komu út af hóteli sínu og lögðu af stað, að flestir þeirra eru karlmenn á miðjum aldri og með huggulegar yngri konur í farþegasætinu.