Japanski rafeindatækjasmiðurinn Sony sýndi óvænt rafbíl á neytendatækjasýningunni í Las Vegas snemma árs, Vision-S. Hlaut hann verðskuldaða athygli.
Hingað til hafa menn einungis getað séð Sony-bíla í leiktækinu Playstation. Á því er að verða breyting því senn hefst þróunarakstur Sony Vision-S, sem er rafbíll og fæst bæði sem bíll er lýtur bílstjóra og sem sjálfekinn rafbíll.
Sony mun hafa keypt skraddarasniðinn undirvagn fyrir Vision-S af fyrirtæki að nafni Benteler. Þaðan fóru þeir til Bosch og fengu þar meginpart rafeindabúnaðar bílsins. Loks fengu þeir fyrirtækið Magna International í Graz í Austurríki til að setja bílinn saman og pakka öllu góssinu fallega inn.
Þar með var kominn lögulegur fernra dyra fleygbakur með þriggja metra öxulhaf. Utanmálin eru 4,90 metrar á lengd, 1,90 metrar á breidd og 1,45 á hæð. Vegur bíllinn 2.350 kíló. Tveir 200 kílóvatta mótorar verða í drifrásinni og verður drif á öllum fjórum hjólum. Ekkert er minnst á drægi í gögnum, heldur ekki á afköst eða hleðslutíma rafgeymanna. agas@mbl.is
Ágúst Ásgeirsson