Úrval rafbíla frá Mercedes-Benz eykst enn
Setja bókamerki
Mercedes-Benz ætlar sér að vera leiðandi í þróun rafbíla á heimsvísu og áætlar þýski lúxusbílaframleiðandinn að kynna átta nýja rafbíla fyrir árslok 2022.
„Þessi hröðun á rafbílaþróun hjá Mercedes-Benz er hluti af Ambition 2039 áætlun bílaframleiðandans sem miðar að því að rafbílar verði 50% af seldum bílum árið 2030 og árið 2039 verða allir bílar kolefnislausir. Hinir nýju rafbílar munu allir bera nafnbótina EQ sem er nýtt undirmerki Mercedes-Benz tileinkað raf- og tengiltvinnbílum,“ segir í tlkynningu.
Nýr EQA kemur til landsins í febrúar nk. en þessi sportjeppi er nú þegar kominn í forsölu hjá Bílaumboðinu Öskju og hægt er að tryggja sér einn af fyrstu bílunum sem koma til landsins á fyrsta ársfjórðungi næsta árs. Bíllinn var frumsýndur í hugmyndaútfærslu árið 2017 og kemur nú í fjöldaframleiðslu. EQA er hreinn rafbíll og verður með yfir 400 km drægi skv. WLTP staðli.
Bílarnir EQB og EQS koma til landsins síðar á árinu.
Þeir bílar sem einnig eru í farvatninu eru EQS, EQB, EQE, EQS SUV og EQE SUV. Af þeim koma EQA, EQB og lúxusrafbíllinn EQS strax á næsta ári en sá síðastnefndi verður nýtt flaggskip rafbílaflota Mercedes-Benz.
Þeir munu koma til liðs við núverandi rafbíla frá Mercedes-Benz þá EQC, EQV og eVito Tourer en þeir tveir síðarnefndu voru frumsýndir fyrir stuttu hjá Bílaumboðinu Öskju. Sportjeppinn EQC var fyrsti hreini rafbíll Mercedes-Benz en hann kom á markað í fyrra og hefur fengið góða dóma.
Daimler tilkynnti nýlega að fyrirtækið hefði fjárfest fyrir alls 730 milljónir evra í verksmiðju sem mun einblína á framleiðslu á rafbílum Mercedes-Benz, en það samsvarar um 118 milljörðum króna. Verksmiðjan er í Sindelfingen í Þýskalandi þar sem fleiri verksmiðjur bílsmiðsins eru staðsettar og hefur fengið heitið „Verksmiðja 56“. Alls hefur Daimler fjárfest fyrir 2,1 milljarð evra á Sindelfingen svæðinu eða tæpa 340 milljarða króna.
„,Við hjá Öskju erum spennt að frumsýna þessa stórglæsilegu bíla frá Mercedes-Benz sem munu koma í sýningarsalinn okkar fljótlega á næsta ári. Það er mjög mikill heiður að Mercedes-Benz horfi á Ísland sem mikilvægan markað fyrir rafbílana sína sem leiðir til þess að við erum með fyrstu mörkuðum í heimi til að fá þá hverju sinni. Núna strax í febrúar munum við frumsýna nýjan EQA sem er framhjóladrifinn borgarjepplingur með yfir 400 km drægi. Verðið kemur líka glettilega á óvart en hann mun kosta frá 6.590.000 og verður þá ríkulega útbúinn,“ segir Jónas Kári Eiríksson, forstöðumaður vörustýringar hjá Bílaumboðinu Öskju.
