Ítalski draumabílaframleiðandinn Lamborghini svipti á dögunum hulunni af nýrri útgáfu af Huracán-sportbílnum.
Huracán kom fyrst á markað árið 2014 og er „litli Lambóinn“ hjá þeim í Sant'Agata Bolognese: ódýrari og nettari um sig en Lamborghini Aventador og með 10 strokka vél í stað 12 strokka. Hefur Huracán gengið í gegnum ýmsar breytingar og betrumbætur undanfarin átta ár og stóðu þar m.a. upp úr Huracán Performante sem var smíðaður frá 2017 og 2019, Huracán EVO sem hefur verið framleiddur frá 2019, og loks kappakstursbrautarbíllinn STO sem frumsýndur var 2021.
Nú bætist Huracán Tecnica við og lendir n.v. á milli EVO og STO hvað kraft og aksturseiginleika varðar.
Á Huracán Tecnica að henta bæði til daglegs aksturs og til að spana á keppnisbrautum. Vélin skaffar allt að 640 hestöfl (CV) og 565 Nm tog, en bætt hönnun þýðir að þegar bíllinn er á ferð er afturdekkjunum þrýst af 35% meiri krafti ofan í malbikið, og vindmótstaða er 20% minni en hjá EVO.
Kælibúnaður bremsukerfis hefur verið endurhannaður og breyttu púströri komið fyrir til að framkalla enn fallegra vélarhljóð. Bíllinn vegur 1.379 kg og er hlutfall krafts og þyngdar 2,15 kg á hvert hestafl. Huracán Tecnica er ekki mjög frábrugðinn bræðrum sínum í útliti. Munar mest um að bíllinn er búinn vindskeið og búið að lækka vélarhlífina á bílnum aftanverðum.
Verða fyrstu eintökin afhent síðar á þessu ári. ai@mbl.is