Hollywood-leikarinn Richard Gere er sagður eiga von á sínu öðru barni í vor að því er fram kemur á spænska miðlinum Hola!. Gere og eiginkona hans, hin spænska Alejandra Silva, eignuðust sitt fyrsta barn saman í febrúar á þessu ári. Það verður því aðeins rétt rúmlega ár á milli barnanna.
Talsmaður Gere hefur hvorki viljað staðfesta né neita því að hjónin eigi von á sínu öðru barni saman.
Hjónin giftu sig í apríl árið 2018 og ekki leið á löngu þar til leikarinn og eiginkona hans, sem er nú 36 ára, staðfestu að von væri á barni. Gere á fyrir Homer James Jigme sem hann eignaðist með fyrrverandi eiginkonu sinni, Carey Lowell, árið 2000. Silva á soninn Albert með fyrrverandi eiginmanni sínum.