Hildur Lilliendahl Viggósdóttir er ein þeirra fjölmörgu ferðamanna sem er föst í útgöngubanni á Kanaríeyjum. Hildur ætlaði upphaflega að fara í tveggja vikna heimsókn og upplestrarfrí til foreldra sinna sem eru með vetursetu í sólinni í Las Palmas en heimflugið hennar var fellt niður.
„Ég var komin hálfa leið hingað þegar það var tekin ákvörðun á Spáni um útgöngubann. Sama dag var tekin sú ákvörðun á Íslandi að fólk sem væri að koma heim frá Spáni færi í tveggja vikna sóttkví,“ segir Hildur en hún flaug út þann 14. mars og hefur því verið á Kanarí í um sex vikur.
Hildur ætlar að bíða ástandið af sér á Kanarí og er ekki að reyna að koma sér heim með krókaleiðum.
„Ég get það ekki. Pabbi er að verða 78 ára gamall og mikill hjartasjúklingur. Eina leiðin heim núna er í gegnum Svíþjóð og þar þarf að bíða í tvo daga,“ segir Hildur og telur sig og foreldra sína öruggari inni í íbúðinni á Kanarí en á flugvelli í Svíþjóð.
Heima á Íslandi bíður fjölskylda Hildar en hún er gift og á tvo syni. Hún hefur ekki miklar áhyggjur þrátt fyrir að ferð hennar hafi lengst töluvert. Eldri sonur hennar er að verða tvítugur og fluttur að heiman og sá yngri er tæplega 12 ára og hefur það bara ágætt með föður sínum. Hildur er búin að vera gift í 10 ár og segir það jafnvel gott fyrir þau hjónin að fá smá hvíld frá hvort öðru.
Það fer ekki illa um Hildi en hún er í íbúð með stórum svölum og fer út að skokka á svölunum. Hún segir ekki mikið öðruvísi að vera föst á Kanarí en á Íslandi fyrir utan veðrið. Hildur sinnir náminu í fjarkennslu og segir félagslíf sitt mjög gott á internetinu.
Hildur passar að huga vel að andlegri heilsu og segir mikilvægt að halda í jákvæðnina.
„Ég held það fyrsta sem ég hafi lært sé að vera þakklát fyrir góð kvíðalyf. Það skiptir ótrúlega miklu máli að huga að andlegri heilsu. Ég stunda bæði hugleiðslu og núvitund af miklu kappi. Það hefur gert mér mjög gott. Ég hef lært að það skiptir máli að eiga gott fólk að. Mér finnst að mörgu leyti að sum sambönd, vinasambönd og sambandið við manninn minn hafi styrkst af þessu. Fólk er vakandi fyrir líðan annarra sem er ofsalega gott að finna. Mér finnst mikilvægt að minna mig á það góða sem getur hugsanlega komið út úr öllum þessum sársauka. Svo finnst mér hollt að rifja upp að við erum raunverulega að verða vitni af merkilegum tímum í mankynssögunni. Við erum að horfa á söguna gerast. Það er mögnuð upplifun þrátt fyrir allt.“