Drake-hótelið í Chicago í Bandaríkjunum hefur sett saman sérstakan Díönu prinsessu-pakka sem felur meðal annars í sér dvöl í svítunni sem Díana prinsessa dvaldi í þegar hún heimsótti hótelið. Pakkinn var settur saman í tilefni 4. seríu The Crown sem kom á Netflix í gær.
Gestir hótelsins fá að upplifa hótelið nákvæmlega eins og það var þegar Díana heimsótti það árið 1996. Svítan sem um ræðir er forsetasvítan á hótelinu en hún fékk nafnið Díönu prinessu-svítan eftir að hún dvaldi þar.
Þeir sem kaupa Crowning a Lady-pakkann fá svítuna útbúna eins og hún var útbúin fyrir prinsessuna með öllu því sem hún bað sérstaklega um. Þar á meðal er þrekhjól og sódavatn. Hún bað einnig um vönd af gleym-mér-ei-um, myndabók um Abba og flösku af Quelques Fleurs frá Houbigant Paris, hennar uppáhaldsilmvatn.
Þar sem pakkinn var settur saman vegna fjórðu seríu The Crown er stórt og gott sjónvarp í svítunni sem hægt er að horfa á The Crown í.
Hin konunglega upplifun endar ekki þar. Gestir sem taka þennan pakka fara í síðdegiste á Palm Court og geta fengið uppáhaldste Díönu, rósa-pouchong. Um kvöldið er svo þriggja rétta kvöldverður með laxi, salati og kanil-biscotti-soufflé, en það er einmitt það sem Díana fékk sér þegar hún dvaldi þar.
Pakkinn kostar litla 32 þúsund bandaríkjadali eða um 4,2 milljónir íslenskra króna.