Tónlistarmaðurinn Joe Jonas og Game of Thrones-stjarnan Sophie Turner giftu sig óvænt í nótt. Létu þau Elvis-eftirhermu pússa sig saman í Las Vegas eftir Billboard-tónlistarverðlaunin.
Vinur hjónanna Diplo birti myndir frá brúðkaupinu og hafa erlendir miðlar á borð við E! og People greint frá hjónabandinu síðan þá. Jonas og Turner tilkynntu um trúlofun sína í desember árið 2017 eftir að hafa verið saman í rúmlega ár.
Þó svo að Elvis hafi gefið hjónin saman var ekki um neitt grín að ræða og sóttu þau um að ganga í hjónaband í Nevada fyrr um daginn. Heimildarmaður People segir einnig hjónabandið hafa verið alvöru og löglegt.