Veðbönkum fyrir Eurovision ber ekki saman um hvort Ísland komist áfram á úrslitakvöld Eurovision-söngvakeppninnar eða ekki. Þegar spá fyrir heildarkeppnina er skoðuð er fulltrúi okkar, Diljá Pétursdóttir, í 22. sæti, sem þýðir að hún myndi komast áfram. Í dag eru 49 dagar í að Eurovision-veislan hefjist.
Þegar veðbankinn er hins vegar skoðaður fyrir seinna undanúrslitakvöldið þá kemst Ísland ekki áfram. Þegar líkurnar eru skoðaðar eru um helmingslíkur að Diljá komist áfram.
Eurovision World tekur saman spár helstu veðbanka og reiknar saman líkurnar.
Fyrir ofan Ísland í spá veðbanka fyrir undanúrslitakvöldið eru til dæmis Danir og Belgar, en Danir eru í 30. sæti í heildarspánni og Belgar í 32. sæti.
Þegar samanreiknuð spá veðbanka er skoðuð fyrir fyrra undankvöldið má sjá að Finnar og Svíar deila þar fyrsta sætinu. Norðmenn eru líka svo gott sem komnir með farmiða á úrslitakvöldið, en þeir eru í 3. sæti með 93% líkur á að komast áfram.
Í heildarspánni er Svíþjóð spáð sigri með miklum yfirburðum. Þar eru þeir með 39% sigurlíkur. Finnum er spáð öðru sæti og eru með 15% líkur á finnskum sigri.