HPP Solutions, dótturfélag Héðins, og finnska fyrirtækið Meitmel gengu á mánudag frá samningi um sölu og uppsetningu á próteinverksmiðju í bænum Kaskinen í Finnlandi. Verðmæti samningsins er 700 milljónir króna, að því er fram kemur í fréttatilkynningu.

Fram kemur í tilkynningunni að próteinverksmiðjan sé „byggð á íslensku verk- og hugviti og var í þróun hjá Héðni í um tíu ár en fyrsta gerð hennar var gangsett árið 2017 um borð í Sólbergi ÓF-1 frá Ramma hf“. Þá var hefur einnig verið sett upp 380 tonna verksmiðja frá HPP í húsakynnum Síldarvinnslunnar í Neskaupstað.

Frétt af mbl.is

Risaþurrkarar Héðins til Neskaupstaðar

Nýr kafli í sögu Kaskinen

Forsvarsmenn Meitmel eru tveir ungir Finnar, Anders Granfors og Jonathan Hast , annar skipstjórnarmenntaður og hinn yfirvélstjóri. Sagt er frá því í tilkynningunni að Kaskinen sé vestast í Finnlandi og að bærinn hafi áður verið ein helsta fiskihöfn Finnlands en nú sé bæjarfélagið það minnsta.

Það hafi haft mikil áhrif atvinnulífið í þorpinu þegar stórri pappírsverksmiðju var lokað kjölfar fjármálahrunsins en nú sé von um að nýr kafli hefjist. Nýja verksmiðjan mun vera í húsnæði sem hefur staðið tómt undanfarin ár en verkefnið er að hluta fjármagnað með styrk frá finnska sjávarútvegsráðuneytinu og Evrópusambandinu.

Frá vinstri: Anders Granfors og Jonathan Hast eigendur Meitmel, Ragnar Sverrisson, framkvæmdastjóri HPP Solutions, Elín Flygenring, sendiherra Íslands í Finnlandi og Pétur Jakob Pétursson, markaðs- og sölustjóri HPP Solutions. Skrifað var undir samninginn í ráðhúsi Kaskinen. Ljósmynd/HPP Solutions

7 milljarða útflutningsverðmæti

HPP, sem varð um áramótin sjálfstætt félag, hefur selt próteinverksmiðjuna í ýmsum útfærslum til skipaútgerða og fyrirtækja í Bandaríkjunum, Þýskalandi, Færeyjum, Englandi, Finnlandi, Frakklandi, Grænlandi og Noregi. Útflutningsverðmætin sem um ræðir, að samningnum við Finnana meðtöldum, nemi samtals um sjö milljörðum króna.

„Styrkleikar HPP próteinverksmiðjunnar liggja í því að hún tekur að minnsta kosti 30 prósent minna pláss, er með 30 prósent færri íhlutum og eyðir 30 prósent minni orku en hefðbundnar fiskimjölsverksmiðjur,“ er fullyrt í tilkynningu félagsins.

Vinnslugeta verksmiðju frá HPP getur verið á bilinu 10 til 400 tonn á dag eftir því hver stærð hennar sé. Sértök einkenni lausnar HPP er sögð vera að verksmiðjan taki um 30% minna pláss, með mun færri íhlutum og eyði 30% minni orku en aðrar fiskimjölverksmiðjur.