George W. Bush, forseti Bandaríkjanna, er ánægður með skýrslu óháðrar rannsóknarnefndar, sem sett var á laggirnar til þess að rannsaka hryðjuverkin í Bandaríkjunum 11. september 2001. Í frétt BBC greinir frá því að Bush hafi lýst sig sammála þeirri niðurstöðu nefndarinnar, að hryðjuverkamennirnir hafi nýtt sér brotalamir í bandaríska stjórnkerfinu þegar þeir skipulögðu og frömdu ódæðin. Bush benti jafnframt á, eftir að skýrslan var birt, að mörg atriði til endurbóta sem rædd væru í henni, hefðu þegar verið framkvæmd. Nefndin lagði til að miklar endurbætur yrðu gerðar á starfsemi bandarískra leyniþjónusta.

„Þar sem ríkisstjórnin þarf að bregðast við, mun hún gera það,“ sagði Bush eftir að hafa fengið eintak af skýrslunni í hendur. Nefndin hefur unnið hörðum höndum að rannsókn málsins í tvö ár.

„Við munum íhuga alvarlega allar tillögur því við deilum sama markmiði,“ bætti Bush við.

John Kerry, mótframbjóðandi Bush úr röðum demókrata í komandi forsetakosningum í Bandaríkjunum, hvatti forsetann til að bregðast skjótt við. „Ef ég verið kjörinn forseti og sé að hlutum hefur ekki fleygt fram með þeim hætti sem skyldi, mun ég ekki bíða dag í viðbót. Ég mun taka af skarið,“ sagði hann.

Leyniþjónustustofnanir hafa verið harðlega gagnrýndar fyrir að takast ekki að afstýra árásunum á New York og Washington, en um 3.000 manns létust í þeim.

Tengdar fréttir

Hryðjuverkaárásir á Bandaríkin

Reyndi að keyra inn í Hvíta húsið

• Opinbera gögn um árásirnar á tvíburaturnana
• Gefa upp nafn þriðja mannsins
• Nýjar ljósmyndir frá árás á Pentagon
• Hafnar ásökunum um aðild Sádi-Arabíu

» Fleiri tengdar fréttir

• Blogga um frétt