Teknir af lífi eftir viðræðuslit
Setja bókamerki
Yfirvöld í Norður-Kóreu tóku sérlegan sendimann ríkisins gagnvart Bandaríkjunum af lífi í kjölfar þess að viðræður leiðtoga landsins, Kim Jong-un og forseta Bandaríkjanna, Donald Trump, runnu út í sandinn. Auk hans voru fjórir aðrir háttsettir embættismenn teknir af lífi.
Þetta kemur fram í frétt í dagblaði, Chosun Ilbo, í Suður-Kóreu dag. Þar segir að Kim Hyok Chol, sem lagði grunninn að fundinum í Hanoi í Víetnam og kom til fundarins í einkalest leiðtogans, hafi verið tekinn af lífi af aftökusveit fyrir að hafa svikið leiðtogann og að hafa snúist á sveif með Bandaríkjunum á leiðtogafundinum.
Kim Hyok Chol var tekinn af lífi í mars á Mirim-flugvellinum ásamt fjórum háttsettum embættismönnum í utanríkisráðuneytinu í kjölfar rannsóknar, segir í frétt blaðsins. Hinir embættismennirnir eru ekki nafngreindir.
Kim Hyok Chol var starfsbróðir Stephen Biegun sem stýrði undirbúningi leiðtogafundarins fyrir hönd Bandaríkjanna í Hanoi í febrúar.
Suðurkóreska ráðuneytið sem fer með samskipti á Kóreuskaganum neitaði að tjá sig um fréttina. Áður hafa slíkar fréttir í fjölmiðlum S-Kóreu ekki alltaf reynst réttar og verið leiðréttar síðar.
Í sömu frétt segir að túlkur Kim Jong-un, Shin Hye Yong, hafi verið send í fangabúðir fyrir mistök sem hún gerði á leiðtogafundinum. Henni mistókst að þýða nýtt tilboð Kim þegar Trump lýsti því yfir að ekki yrði um neitt samkomulag að ræða og gekk í burtu frá samningaborðinu.
Fundinum í Hanoi lauk án þess að leiðtogarnir undirrituðu samning eða yfirlýsingu eins og vonir stóðu til. Nokkrir sérfræðingar í málefnum Norður-Kóreu töldu að viðræðurnar hefðu ekki verið til einskis þrátt fyrir þessa niðurstöðu og sögðu að enginn samningur væri betri en slæmur.
Síðan þá hefur N-Kórea aukið þrýsting á samskipti ríkjanna meðal annars með tveimur eldflaugatilraunum nú í maí.
Auk Shin var Kim Yong Chol, sem stýrði kjarnorkuviðræðunum fyrir hönd N-Kóreu við utanríkisráðherra, Mike Pompeo, sendur í þrælkunarbúðir.
Strand skemmtiferðaskips kallar á erlenda aðstoð
Banna mengandi búnað sem leyfður er á Íslandi
Skaut sex sinnum að feðginum á aðfangadagskvöld
Nemendur í HÍ reistu tjaldbúðir án leyfis
Norskur lögreglumaður dæmdur
Vonast til að tjaldbúðir við HÍ standi áfram