Breska ríkisstjórnin segist vera tilbúin til að hefja aftur fríverslunarviðræður við Evrópusambandið vegna Brexit og eiga viðræðurnar að fara af stað í London á morgun.
„Það er ljóst að töluvert ber enn í milli varðandi afstöðu okkar í erfiðustu málunum en við erum tilbúin, ásamt ESB, til að athuga hvort það er mögulegt að brúa bilið í kröftugum viðræðum,“ sagði talsmaður Boris Johnsons, forsætisráðherra Bretlands.
Talsmaður forsætisráðuneytisins greindi frá því á föstudaginn að viðræðunum væri lokið. Enginn tilgangur væri með frekari viðræðum nema Evrópusambandið væri reiðubúið til þess að ræða lagaleg atriði samkomulagsins í smáatriðum.