Eitt virkasta eldfjall heims, hið indónesíska Merapi, gaus í morgun, og sendi frá sér heitt rautt hraun. Merapi er staðsett nálægt borginni Yogyakarta á Java-eyju. Fjallið hafði þegar spúið hrauni um tuttugu sinnum á síðustu tveimur dögum og valdið hundruðum minni háttar jarðskjálfta samkvæmt skýrslu jarðfræðistofnunar Indónesíu.
„Í morgun urðum við vör við hraunflóð sjö sinnum,“ sagði í tilkynningu frá stofnuninni en fjallið spúði hrauninu allt að 700 metra til suðvesturs.
Opinber viðvörun um stöðu eldfjallsins er þrátt fyrir allt óbreytt en hún hefur haldist á næsthæsta stigi frá nóvember í fyrra.
Íbúum á svæðinu var sagt að forðast að vera staðsettir í fimm kílómetra radíus frá gígnum.
Í síðasta mánuði spúði eldfjallið risastórum reyk- og öskuskýjum.
Síðasta stóra eldgos í Merapi varð árið 2010. Fleiri en 300 fórust í gosinu og 280.000 manns þurftu að yfirgefa heimili sín. Árið 1930 varð einnig stórt gos í eldfjallinu en þá létust 1.300 manns. Árið 1994 fórust 60 manns vegna goss í Merapi.