Danmörk er að stórum hluta til orðin gul og rauð á uppfærðu korti sóttvarnastofnunar Evrópu. Kaupmannahöfn er rauðlituð og nyrðri hluti Jótlands er gulur. Kortið er unnið upp úr nýgengi smita síðustu 14 daga og sýnir stöðu kórónuveirufaraldursins í löndum Evrópu.
Á vefsíðu Danmarks Radio er virkni bóluefnanna lofuð þar sem Torels Lillebæk forstöðumaður sóttvarnastofnunar Danmerkur segir bóluefnin gefa góða raun gegn Covid-19. Tilefnið er fregnir af því að einungis 1.223 smit hafa greinst af þeim 1.623.234 sem hafa fengið seinni sprautu bóluefnis.
Öldurhús Danmerkur mega frá og með miðnætti í nótt hafa opið til tvö í stað þess að þurfa að loka á miðnætti sem hefur verið reglan síðastliðinn mánuð.