Líkfundur: Er Stavern-ráðgátan að leysast?

Lögreglan í suðausturumdæminu norska segir að líkfundur við Tenvikodden, milli Larvik og Stavern, í hádeginu í dag verði að skoðast í samhengi við mál konu sem leitað hefur verið síðan 2. janúar þegar sambýlismaður hennar á sextugsaldri fannst látinn á heimili þeirra. Frá þeim degi hefur hvorki gengið né rekið með rannsókn málsins.

Frétt af mbl.is

Faldi hann líkið og fyrirfór sér?

Það var klukkan 12:45 í dag sem vegfarandi á Tenvikodden, vinsælu útivistarsvæði í nágrenni smábæjanna tveggja, hafði samband við lögreglu og tilkynnti um látna manneskju þar. Segir Birger Andersen lögregluvarðstjóri í samtali við norska dagblaðið VG að fundarstaðurinn sé þó ekki í alfaraleið og nokkuð torfært þangað.

Ekki hafa enn verið borin kennsl á líkið en lögregla segir einkum tvennt benda til þess að um konuna í Stavern-málinu sé að ræða – kennara við barnaskóla í Porsgrunn sem að sögn skólastjóra þar var hvers manns hugljúfi – klæðaburð líksins og þá staðreynd að aðrir eru ekki á lista yfir fólk sem saknað er á þessu svæði.

Ekki ástæða til að leita á oddanum

Eins og norskir miðlar og mbl.is greindu frá fyrr í vetur var leit að konunni gríðarlega umfangsmikil en þó var aldrei leitað á Tenvikodden eða í nágrenni hans. „Þetta svæði er um fjóra kílómetra í loftlínu frá íbúð hinnar horfnu. Við höfum ekki haft ástæðu til að leita þar áður,“ segir Ole Jacob Garder, ákæruvaldsfulltrúi lögreglunnar, við VG.

Tekur hann sérstaklega fram að enn sé of snemmt að segja til um hvort andlát manneskjunnar fundnu hafi borið að með saknæmum hætti. Krufning muni skera úr um það.

Frétt af mbl.is

Leitarfólk í tveggja sólarhringa hvíld

Ellen Holager Andenæs, réttargæslulögmaður fjölskyldu konunnar, segir skjólstæðinga sína harmi slegna nú þegar nánast þyki ljóst hversu komið sé. „Samtímis er þeim létt yfir að hún sé fundin. Fyrir þau táknar það ef til vill endalok mjög erfiðs tímabils,“ segir Andenæs.

Stein Grimsrud býr í næsta nágrenni við fundarstaðinn og ræðir við blaðamenn VG. Segir hann fjölmennt lögreglulið hafa verið á svæðinu í allan dag og sjálfur kveðst hann hafa fengið að vita frá lögreglu að hann megi reikna með að verða boðaður til skýrslutöku. Hann segir mjög torvelt að komast að líkfundarstaðnum landleiðina en Tenvikodden liggur út í Larvik-fjörðinn sem er sjö kílómetra langur þar sem hann teygir sig inn að Larvik.

Bíða þess að ræða við lögreglu

„Ég bý þarna í nágrenninu,“ segir hinn kunni norski glæpasagnahöfundur og fyrrverandi rannsóknarlögreglumaður Jørn Lier Horst við VG og bætir því við að tæknideild lögreglu hafi verið við störf á vettvangi líkfundarins í allan dag.

Frétt af mbl.is

Gefa upp von um að konan finnist á lífi

Sol Elden, réttargæslulögmaður fjölskyldu sambýlismannsins sem fannst örendur í íbúð þeirra konunnar í janúarbyrjun, staðfestir í tölvupósti til VG að henni og skjólstæðingum hennar hafi verið kunngert um líkfundinn. „Fyrir utan það þekkjum við ekki til neinna smáatriða eins og er og bíðum þess að ræða við lögreglu,“ skrifar Elden.

VG

NRK

TV2

Aftenposten

• Blogga um frétt