Man ekki eftir annarri eins veðurblíðu

Ísfisktogarinn Helga María AK lét úr höfn í Reykjavík í gær eftir að hafa komið þangað með 165 tonna afla úr vel heppnaðri veiðiferð á Vestfjarðamið. Heimir Guðbjörnsson, skipstjóri á Helgu Maríu, minnist þess ekki að hafa fengið aðra eins veðurblíðu á Vestfjarðamiðum á þessum árstíma.

Þetta kemur fram á vef HB Granda en þar er rætt við Heimi, sem byrjaði veiðarnar í Víkurálnum.

„Þar fengum við þokkalegan karfaafla, að minnsta kosti nóg fyrir vinnsluna. Við fórum svo norður eftir kantinum og vestast í kantinum, áður en við komum á Halamið, fengum við þann þorskafla sem við þurftum. Það var lítil veiði á sjálfum Halanum, helst smávegis af ufsa, og við fórum því aftur í Víkurálinn,“ segir Heimir.

Spáð brælu á Vestfjarðamiðum

Þegar áhöfnin á Helgu Maríu kom aftur í Víkurálinn gaf ufsinn sig til.

„Það kom gott ufsaskot í veiðina á meðan við stöldruðum við og við fengum fínan ufsaafla síðustu dagana í veiðiferðinni. Nú spáir hins vegar brælu á Vestfjarðamiðum næstu dagana þannig að lítið vit er í að fara beint þangað. Við byrjum þessa veiðiferð því á heimamiðum út af Suðvesturlandi.“

• 1 blogg um fréttina

Bloggað um fréttina

• Eyjólfur Jónsson: Átti þessi afli ekki að fara til Ísafjarðar?