Ef Ísland á að ná markmiðum um samdrátt í losun gróðurhúsalofttegunda af mannavöldum til ársins 2030 í takt við skuldbindingar Íslands gagnvart Parísarsamkomulaginu, verður að líta til vaxtar í losun flugsamgangna og bifreiða vegna aukins fjölda ferðamanna.
Þetta er meðal þess sem kemur fram í skýrslu ferðamála-, iðnaðar- og nýsköpunarráðherra um innlenda eldsneytisframleiðslu.
Í skýrslunni segir að fram til ársins 2005 hafi mest losun verið frá fiskveiðiflotanum, „en kvótakerfið og stöðugar nýjungar í hönnun, þróun og stýringu búnaðar hefur leitt til minni eldsneytisnotkunar og þar af leiðandi verulegs samdráttar í losun flotans.“
Þá hafi losun frá bifreiðum farið fram úr fiskveiðiflotanum árið 2005 „en dróst saman eftir hrun en óx hratt aftur frá og með 2014. Mikill vöxtur hefur verið í eldsneytisnotkun og losun frá flugsamgöngum frá 2009 sem varð mesti losunarvaldurinn frá 2015.“
Einnig er bent á að frá árinu 2014 hafi orðið mikill vöxtur í eldsneytisnotkun bifreiða og losun vegna vegna þessa. „Vöxtur í losun frá flugi og bifreiðum er talinn tengjast auknum fjölda ferðamanna.“
Alþjóðaflug er þó undanskilið Parísarsamkomulaginu.