Reiðhjólamaður slasaðist við Hafravatn

Lögreglan á höfuðborgarsvæðinu sinnti í dag útkalli vegna reiðhjólamanns sem slasaðist við Hafravatn. Viðkomandi var fluttur með sjúkrabíl á bráðamóttöku til aðhlynningar. 

Fram kemur í dagbók lögreglu að nokkur fjöldi ökumanna hafi verið handtekinn vegna gruns um akstur undir áhrifum fíkniefna eða áfengis. 

Þá var tilkynnt um eld í golfskálanum á Korpúlfsstöðum, en búið var að slökkva eldinn þegar lögregla og slökkvilið kom á vettvang. Slökkvilið aðstoðaði með reykræstingu. 

Þá var nokkuð um þjófnað og innbrot í dag. Um klukkan 12:30 var tilkynnt um þjófnað í verslun í miðbænum, en gerendur, sem voru þrír, voru farnir af vettvangi þegar lögregla kom á vettvang. 

Skömmu síðar sáu vegfarendur til þriggja manna stela rafmagnsvespu í miðbænum, en þeir höfðu klippt á hjólalás sem var festur í hjólið. Lögregla fann mennina nokkru seinna og reyndust þetta vera sömu aðilar og í þjófnaðarmálinu stuttu áður. 

mbl.is

Bloggað um fréttina