Rannsaka myndband dýraverndarsamtaka

Matvælastofnun.
Matvælastofnun. mbl.is/Sigurður Bogi Sævarsson

Matvælastofnun hefur til rannsóknar myndband frá dýraverndarsamtökunum AWF/TSB (Animal Welfare Foundation/Tierschutzbund Zürich) sem sýnir myndbrot frá blóðtöku úr fylfullum hryssum.

Verklag sem þar kemur fram virðist stríða gegn starfsskilyrðum starfseminnar sem eiga að tryggja velferð hryssnanna, að því er segir í tilkynningu Matvælastofnunar, sem lítur málið alvarlegum augum. Vísir greindi fyrst frá. Þar kemur fram að ráðherra hafi verið upplýstur um málið. 

Eftirlit með blóðtöku úr fylfullum hryssum er áhættumiðað og í forgangi hjá stofnuninni. Frá gildistöku reglugerðar um velferð hrossa hefur stofnunin sett skýr skilyrði fyrir blóðtöku úr fylfullum hryssum og aukið eftirlit með starfseminni jafnt og þétt. Samhliða því hefur greinin verið í miklum vexti, en í ár voru 5383 hryssur nýttar í þessa starfsemi á 119 starfsstöðvum (bæjum), segir einnig í tilkynningunni.

Heimildarmynd dýraverndarsamtakanna: 

„Reglubundið eftirlit er tvíþætt: Annars vegar eftirlit með velferð, aðbúnaði og ástandi hrossa sem tengjast starfseminni hjá umráðamönnum þeirra samkvæmt skoðunarhandbók. Hins vegar er um að ræða sérstakt eftirlit með velferð hryssna við blóðtöku. Sú starfsemi er háð tilgreindum skilyrðum sem Matvælastofnun setur. Sjálf blóðtakan er á ábyrgð líftæknifyrirtækisins Ísteka ehf, sem nýtir afurðina, en dýralæknar á vegum þess sjá um framkvæmd blóðtökunnar. Þá er gerð krafa um virkt innra eftirlit Ísteka ehf með velferð hryssnanna á blóðtökutímabilinu og árlega skýrslu þar að lútandi,“ segir í tilkynningunni.  

Fram kemur að áhersla á eftirlit hafi aukist og sé í stöðugri endurskoðun. Matvælastofnun heimsæki um 20% starfsstöðva árlega á meðan á blóðtöku stendur og önnur 20% fá heimsóknir eftirlitsmanna yfir vetrartímann.

Starfsemin stöðvuð á fimm stöðvum 

Ef alvarleg frávik koma í ljós við eftirlitið er starfsemin tafarlaust stöðvuð. Alls hefur komið til stöðvunar á starfsemi á fimm starfsstöðvum frá 2014.

„Reglulega er fylgst með blóðbúskap hryssnanna og sýna þær rannsóknir að blóðtakan, eins og hún er framkvæmd hér á landi, er innan ásættanlegra marka fyrir heilsu þeirra og velferð og hryssurnar eiga auðvelt með að vega upp blóðtapið. Frá því farið var að skrá afföll tengd blóðtökunni, vegna slysa eða veikinda, hafa þau verið < 1/1000 árlega sem er með því allra lægsta sem þekkist í búfjárhaldi almennt og ending hryssnanna er góð. Sömuleiðis er hverfandi lítið um efnaskiptasjúkdóma í tengslum við blóðtökuna (framleiðslusjúkdóma) sem og aðra sjúkdóma. Þá er staða smitsjúkdóma í íslenska hrossastofninum einstök á heimsvísu.

Það er mat Matvælastofnunar að blóðtaka úr fylfullum hryssum, sem framkvæmd er samkvæmt skilyrðum stofnunarinnar, sé í samræmi við lög nr 55/2013 um velferð dýra.“

mbl.is