Innlent | mbl | 11.11.2023 | 15:48 | Uppfært 19:57

Katrín leggur fram frumvarp um að verja innviði á Reykjanesi

Jarðhitavirkjunin við Svartsengi. mbl.is/Arnþór

Katrín Jakobsdóttir forsætisráðherra hefur nú lagt fram frumvarp um vernd mikilvægra innviða á Reykjanesi.

Í frumvarpinu segir að markmið laganna er að verja mikilvæga innviði og aðra almannahagsmuni á Reykjanesskaga fyrir hugsanlegum eldsumbrotum. Munu lögin gilda um nauðsynlegar framkvæmdir í þágu almannavarna á Reykjanesskaga eftir því sem nánar greinir í ákvæðum laganna og fer ríkislögreglustjóri með framkvæmd aðgerða sem tekin er ákvörðun um á grundvelli laga þessara.

Í frumvarpinu er kveðið á um að þeim ráðherra sem fari með málefni almannavarna sé heimilt að fenginni tillögu ríkislögreglustjóra að taka ákvarðanir um nauðsynlegar framkvæmdir í þágu almannavarna, sem miði að því „að koma í veg fyrir að mikilvægir innviðir og aðrir almannahagsmunir verði fyrir tjóni af völdum náttúruvár sem tengist eldstöðvakerfum á Reykjanesskaga.“

Þær framkvæmdir sem falla undir lögin eru uppbygging varnargarða, gerð varnarfyllinga yfir veitumannvirki og gröftur leiðarskurða. Segir í lögunum að tillaga ríkislögreglustjóra skuli að lágmarki fela í sér mat á nauðsyn viðkomandi framkvæmda „m.a. með tilliti til þeirra hagsmuna sem til stendur að verja ásamt tæknilegri lýsingu mannvirkjanna, fyrirhugaðri staðsetningu þeirra og kostnaðaráætlun að því marki sem hún liggur fyrir.“

Fá skamman frest til að koma sjónarmiðum á framfæri

Í frumvarpinu er einnig kveðið á um samráð vegna ákvarðana um framkvæmdir, og sagt að veita skuli landeiginum þar sem ætlunin sé að fara í nauðsynlegar framkvæmdir tækifæri til að koma að sjónarmiðum sínum áður en ákvörðun sé tekin.

Þá skal ráðherra einnig gefa sveitarfélagi þar sem hinar nauðsynlegu framkvæmdir eru fyrirhugaðar, sem og ráðherrum sem fara með skipulagsmál, náttúruvernd og ríkisfjármál, Vegagerðinni, Skipulagsstofnun, Umhverfisstofnun, Náttúrufræðistofnun Íslands og Minjastofnun Íslands, skamman frest til að koma sjónarmiðum sínum á framfæri.

Skal ráðherra taka mið af tillögum og athugasemdum þessara aðila eins og kostur er, en í lögunum segir einnig að ef brýna nauðsyn beri til og ákvörðunin þoli ekki bið geti hann tekið hana þó að sjónarmið þeirra liggi ekki fyrir.

Leggja gjald á allar húseignir

Í frumvarpinu segir að leggja skuli árlegt gjald á allar húseignir, sem nemi 0,08‰ af brunabótamati samkvæmt lögum um brunatryggingar. Eiga tekjur af gjaldinu renna í ríkissjóð.

Er vátryggingafélögum falið að innheimta gjaldið með iðgjöldum skv. 3. mgr. 11. gr. laga um Náttúruhamfaratryggingu Íslands, nr. 55/1992, og gilda 3. og 5. mgr. 11. gr. þeirra laga um innheimtu þess. Álagning gjaldsins skal ekki hafa áhrif til hækkunar á innheimtuþóknun til vátryggingafélaga.

Ráðherra sem fer með ríkisfjármál getur kveðið nánar á um framkvæmd þessarar greinar í
reglugerð, þar á meðal um innheimtu gjalds.

Þá er kveðið á um að lögin muni þegar öðlast gildi við samþykkt frumvarpsins, og að þau muni falla úr gildi 1. janúar 2025.

Frumvarpið má nú sjá á vef Alþingis.

Fréttin hefur verið uppfærð.