Tveir leiðsögumenn við Eystri-Rangá lönduðu um 160 löxum úr ánni á síðustu níu dögum. Annar þeirra var Reynir Már Sigmundsson og hann sagði í samtali við Sporðaköst að hann væri hreinlega lemstraður eftir þetta. „Mér líður eins og ég hafi lent undir valtara.“
Þeir félagar Reynir Már og Albert Jensson leiðsögumaður veiddu flesta laxana á flugu en þegar þreytan lét til sín segja skiptu þeir af og til yfir í spún. „Það er allt annað sjá ána en síðustu ár. Eins árs laxinn er rosalega flottur, mikið á bilinu 65 til 70 sentímetrar og þykkur og sterkur eftir því.“
Eitthvað er minna af tveggja ára laxi segir Reynir Már en þó settu þeir í nokkuð af stórlaxi. Sá stærsti mældist 96 sentímetrar. „Svo missti ég þann stærsta sem ég hef sett í hér. Hann var hrikalegur en missti hann.“
Laxinn er orðinn vel dreifður og öll svæði eru inni. Reynir Már vitnaði til bónda sem var að kíkja eftir laxi í Hólsá. „Það var rosagott veður og hann taldi fimmtán grúppur af laxi sem hann sá þessa kvöldstund. Þetta var fiskur sem gekk að austanverðu og það er lax sem er á leið upp í eystri.“
Eins og Sporðaköst greindu frá hættu Rússar við að koma að veiða í Eystri-Rangá og því opnaðist þetta tækifæri fyrir leiðsögumenn og aðra. „Þetta var bara einstök lífsreynsla og forréttindi að komast í þetta,“ sagði Reynir Már, kominn til byggða og lúinn eftir níu daga laxveiði.
Lengd á laxi | Veiðisvæði | Veiðimaður | Dagsetning Dags. |
---|---|---|---|
101 cm | Vatnsdalsá | Erlendur veiðimaður | 29. september 29.9. |
101 cm | Eystri-Rangá | Grzegorz Loszewski | 27. september 27.9. |
105 cm | Hvítá við Iðu | Katrín Tanja Davíðsdóttir | 24. september 24.9. |
101 cm | Víðidalsá | Jón Eðvald Halldórsson | 22. september 22.9. |
107 cm | Grímsá | Jón Jónsson | 22. september 22.9. |
101 cm | Miðfjarðará | Agnar Sigurjónsson | 22. september 22.9. |
101 cm | Hvítá við Iðu | Gunnar Pétursson | 20. september 20.9. |