Síðustu dagar í sjóbirtingsveiðinni í Geirlandsá hafa verið afar skrautlegir. Hollið sem er að ljúka veiðum á hádegi í dag lenti í kolvitlausu veðri. Hífandi rok og slagveðurs rigning gerðu mönnum erfitt fyrir. Svo mikil var úrkoman að áin fór úr átta rúmmetrum í níutíu. Ellefu faldaðist á nokkrum klukkutímum.
Það sem kom mönnum hins vegar skemmtilega á óvart var að tveir stærstu fiskar haustsins veiddust við þessar aðstæður. Sá stærsti til þessa mældist 86 sentímetrar og var það Þorlákur Marteinsson sem veiddi hann í Tóftinni sem er beint fyrir neðan veiðihúsið. Um svipað leiti veiddist 84 sentímetra birtingur og þar var að verki Ragnar M. Ragnarsson. Sá fiskur tók svartan Toby spún í ármótum og var sleppt.
Áin sjatnaði mikið í nótt og voru komnar góðar aðstæður í morgun. Þá glæddist veiðin og voru fiskar stökkvandi um allt, að sögn Jóns Kristins Jónssonar sem er að veiðum í Geirlandsá. Snemma í morgun voru þeir búnir að landa tveimur.
„Þetta er búið að vera erfitt sökum veðurs en við erum mjög sáttir með veiðina. Þessi síðasta vakt þá er allt komið í kjör skilyrði og við erum að verða varir við fisk um alla á,“ sagði Jón Kristinn í samtali við Sporðaköst og var þá rétt búinn að landa fallegum sjóbirtingi sem var sleppt. „Hollið á undan okkur landaði 24 fiskum upp í áttatíu sentímetra.“
Geirlandsá er ein af nafntoguðustu sjóbirtingsám V-Skaftafellssýslu. Þar er veitt á fjórar stangir og er þriggja fiska kvóti á stöng á dag.
„Við fréttum af hollinu sem er að veiða í Grenlæk og þeir lönduðu sjö birtingum í ljósaskiptunum í gærkvöldi, um leið og fór að lygna,“
Geirlandsáin hefur verið hratt fallandi og er ljóst að síðdegis verður áin að öllum líkindum komin í kjörvatn. „Við öfundum gæjana sem eru að taka við af okkur,“ sagði Jón Kristinn brosandi.
Lengd á laxi | Veiðisvæði | Veiðimaður | Dagsetning Dags. |
---|---|---|---|
101 cm | Vatnsdalsá | Erlendur veiðimaður | 29. september 29.9. |
101 cm | Eystri-Rangá | Grzegorz Loszewski | 27. september 27.9. |
105 cm | Hvítá við Iðu | Katrín Tanja Davíðsdóttir | 24. september 24.9. |
101 cm | Víðidalsá | Jón Eðvald Halldórsson | 22. september 22.9. |
107 cm | Grímsá | Jón Jónsson | 22. september 22.9. |
101 cm | Miðfjarðará | Agnar Sigurjónsson | 22. september 22.9. |
101 cm | Hvítá við Iðu | Gunnar Pétursson | 20. september 20.9. |