Evrópumót í þorski og ufsa í Ólafsvík

Evrópumeistaramót í tegundaveiði (Species Competition) í sjóstangaveiði hefst í Ólafsvík í dag. Keppendur eru um sjötíu talsins frá tíu löndum. Flest lönd sem taka þátt senda landslið og sum hver bæði A og B landslið.

Mótið var sett í gær en veitt er í dag og á morgun. Einungis þorskar og ufsar telja til stiga og því stærri sem fiskarnir eru því fleiri stig gefa þeir.
Lið frá Suður–Afríku hefur tekið mótið mjög alvarlega og kom hingað í æfingabúðir í um viku tíma og voru með aðsetur fyrir norðan.

Skarphéðinn segir Suður - Afríska liðið skipað einbeittum og flinkum veiðimönnum. Svo er bara að sjá hvernig þeim gengur fyrir vestan. Ljósmynd/Skarphéðinn

„SADSAA eða South African Deep Sea Angling Association er svokallað tengt félag í okkar Evrópsku samtökum og sendu þeir landslið sitt hingað til þess að taka þátt í mótinu.
Þessir kappar hafa verið hjá mér núna í tæpa viku til þess að undirbúa sig fyrir mótið. Ég er búinn að reyna að þjálfa þá eftir bestu getu og hefur gengið afar vel. Þeir eru afar einbeittir og snjallir veiðimenn.
Það er mín trú að þeir muni standa sig afar vel í mótinu,“ sagði Skarphéðinn Ásbjörnsson sem keppt hefur fyrir Íslands hönd í mótum af þessum toga og er einn af keppundum í Ólafsvík í dag og á morgun.

Keppendur koma frá þessum löndum: Englandi, Belgíu,  Wales, Portúgal,  Skotlandi,  Írlandi, Þýskalandi,  Gíbraltar,  Suður- Afríku og Íslandi.

Veitt er af 23 bátum og er dregið um hver lendir á hverjum bát, og deila þrír til fjórir keppendur báti.

• Blogga um frétt

Seinustu hundraðkallar sumarsins